"Mumbay Siti" bosh murabbiyi: "Hisobni inobatga olmaganda, o‘zimizning eng yaxshi o‘yinlarimizdan birini namoyish etdik"

Osiyo Chempionlar ligasi 2-turidan o‘rin olgan "Navbahor" - "Mumbay Siti" bahsi bo‘lib o‘tdi. Mazkur bellashuvda namanganliklar 3:0 hisobida zafar quchdi. 

Uchrashuvdan so‘ng hindistonliklar bosh murabbiyi Desmond Bukingem matbuot anjumanida o‘z fikrlari bilan o‘rtoqlashdi. 

"Hammaga xayrli kech! Bugun borimizni berib harakat qildik. Bahs biz uchun qiyin kechdi. 

Uchrashuv avvalida nazoratni o‘z qo‘limizga oldik. Birinchi taymning oxirgi 5 daqiqasi esa o‘yin stsenariysini tubdan o‘zgartirib yubordi. Hisobni inobatga olmaganda, biz o‘zimizning eng yaxshi o‘yinlarimizdan birini namoyish etdik. 

Havo juda yaxshi edi. O‘zimni xuddi yurtim Angliyada bo‘lgandek his qildim. Bugun issiqroq kiyinishga majbur bo‘ldim. Sababi, Hindistonda odatda 30-35 daraja issiq havo hukmron bo‘ladi. 

Raqib haqida to‘xtaladigan bo‘lsak, darvozabon juda ajoyib harakat qildi. U asosiy rolda jamoasining g‘alabasiga katta hissa qo‘shdi. 

Shuningdek, 10-raqamli futbolchi (Jamshid Iskanderov) mening xotiramda qoladigan bo‘ldi. U posbon kabi katta masshtabdagi ishni bajarib berdi. 

Shunga qaramay, yigitlarim haqida salbiy fikr aytmoqchi emasman. Ular bor kuchlari bilan g‘alaba uchun kurashishdi. Futbolchilarni tanqid qilsam, bu ularga nisbatan hurmatsizlik bo‘ladi", - dedi mutaxassis.