Мундиалга илк қадамлар: Равшан Эрматов Ўзбекистон терма жамоасининг режаси ҳақида гапирди

Ўзбекистон футбол ассоциациясининг биринчи вице-президенти Равшан Эрматов УзАга интервью бериб, Жаҳон чемпионати олдидан жамоамизнинг тақвими ҳамда бўлажак турнирдан кутилаётган натижалар ҳақида ўз фикрлари билан ўртоқлашди. 
 
"Ўзбекистон терма жамоаси 5 май куни "Миллий футбол маркази"да Жаҳон чемпионатига тайёргарлик кўришни бошлашади. Умид қиламиз, барча ўйинчиларимиз соғлом ҳамда юқори формада келиб, мундиалга яхши тайёргарлик кўришади. 5 майдан 26 майга қадар "Миллий футбол маркази"да йиғинлар ўтказилади. 
 
Шунингдек, 3 та назорат учрашувлари бўлиб ўтади. 26 май куни эса Нью-Йоркка учиб кетиб, у ерда машғулотлар бошланади. 30 майда Канадага бориб, 1 июнь куни бўлиб ўтадиган Канадага қарши биринчи ўртоқлик учрашувига тайёргарлик кўрилади ва ўйин ўтказилиб, яна Нью-Йоркка қайтилинади. 2 июндан бошлаб, Нью-Йоркда бир ҳафталик ўқув-йиғин машғулотлари бўлиб ўтади. Ушбу вақт давомида футболчиларимиз вақтга ва иқлимга анча мослашган бўлади. 
 
Бундан ташқари, 8 — 9 - июнь кунлари яна бир ўртоқлик беллашувида иштирок этамиз. Бу борада сўнгги музокаралар ўтказиляпти. Кейин эса 10 июнь куни терма жамоамиз ФИФА томонидан ажратилган Атлантадаги базага учиб бориб, Колумбияга қарши илк ўйин учун охирги тайёргарликни амалга оширишади. 
 
Ўзбекистон терма жамоаси Жаҳон чемпионатига илк бор чиқаётгани боис, уларга юкламалар камроқ бўлади. Айнан бу мундиалдан кутилмалар қандай? 
 
"Албатта, биз Жаҳон чемпионатини узоқ кутдик. Халқимизнинг дуолари орқали шу ергача етиб келдик. Шунингдек, президентимиз ишончлари ва қўллаб-қувватловлари билан Жаҳон чемпионатига чиқадиган кун ҳам келди. Бўлажак турнирда муваффақиятли иштирок этиб, халқимизни хурсанд қилиш - асосий вазифамиздан бири. Шунингдек, гуруҳдаги рақибларимиз жиддий. Португалия терма жамоаси 9 марта, Колумбия 7 марта иштирок этишга муваффақ бўлган. Бироқ, бизда ҳам жуда яхши жамоа шаклланганлигини сўнгги ўйинлар кўрсатмоқда. Насиб қилса, жамоамиз билан яхши иштирок этган ҳолда, халқимизни хурсанд қиламиз деган умиддамиз", - дея ўз фикрлари билан ўртоқлашди Равшан Эрматов.