"Мураббий мен ўйлаганимдан ҳам анча яхши экан, "Навбаҳор"нинг таклифини эшитгач, стадиондаги муҳит кўз олдимга келди" ёхуд Ислом Кенжабоев чемпионлик орзусида

“Навбаҳор” ўз таркибини қай даражада кучайтираётганидан яхши хабардорсиз. Клуб амалга ошираётган трансферларни кўрар экансиз, янги футболчилар сараланиб олинаётганига гувоҳ бўласиз.

Иқтидорли ўйинчи Ислом Кенжабоев ҳам энди “Навбаҳор”нинг бир бўлагига айланди. Ўтган мавсумни Жанубий Кореяда бошлаб, “Қизилқум” клубида тугатган ярим ҳимоячи катта ниятлар билан “Навбаҳор”га келди. Қолаверса, жамоанинг ҳам ундан умиди катта. Sports.uz мухбири эса Кенжабоевга бир қатор саволлар билан мурожаат қилди.

- Ислом, “Навбаҳор” клубига ўтишингиз нима билан боғлиқ?

- “Навбаҳор”га ўтишимнинг асосий сабаби шуки, жамоанинг олдига қўйилган мақсадлари жуда юқори. Осиё Чемпионлар лигаси йўлланмасини қўлга киритиш вазифаси ҳам турибди. Клубга мени бош мураббийнинг ўзи таклиф қилди. Мураббий билан гаплашиб олдик, мақсадларни юқори қўйгани учун наманганликлар вариантини танладим.

- Наманганликлар таклифини эшитганингизда қандай ҳис-туйғуларга берилдингиз?

- Ҳис-туйғуларга келадиган бўлсак, “Навбаҳор”дан илк таклиф тушиши биланоқ, дарҳол жамоанинг мухлислари, стадиондаги муҳит кўз олдимга келди.

- “Қизилқум”ни тарк этишни ўйлаб турганмидингиз ёки “Навбаҳор”нинг таклифидан сўнг, барчаси ўзгариб кетдими?

- “Қизилқум” клубини тарк этиш менинг режаларимда бор эди. Ўзим ҳам мавсум якунланишини кутиб тургандим. Чунки менга яхши таклифлар бўлаётганди. Нима десам бўлади? Навоийликлар сафига иккинчи даврада қўшилдим. У ерда ёмон ўйнадик, деб айта олмайман. Яхши ўйнадик.

- “Навбаҳор” либосида тўп суриш осон эмас. Айниқса, Наманганда минглаб мухлислар қаршисида ўйин кўрсатиш ҳар қандай ўйинчига босим юклайди. Бундай катта ажиотажга ўзингизни қандай тайёрлаяпсиз?

- “Навбаҳор”нинг мухлисларини анчадан бери биламиз. Уларнинг қандай ишқибозлик қилишини бутун Ўзбекистон билади. Янги муҳитга кўникишга ҳаракат қиламиз. Шунингдек, жамоага ёрдам бериш учун яхши ўйинлар кўрсатишга ҳамда ғалабаларига муносиб ҳисса қўшишга бор кучимни сарфлайман. Мухлислардан эса бизни қўллаб-қувватлашини сўраб қоламиз. Худо хоҳласа, барчаси яхши бўлади.

- Биринчи марта Самвел Бабаян билан бирга ишлаш имконига эга бўляпсиз. Унинг иш услубига мослашиш қандай кечяпти?

- Юқорида айтганимдек, бош мураббий билан гаплашдик. Мен ўйлаганимдан ҳам анча яхши экан. Шунга машғулотлари ҳам жуда қизиқарли. Айни пайтда кўпроқ жисмоний тайёргарлигимизни яхшилашга эътибор қаратяпмиз. Машғулотларимиз ҳам асосан шунга қаратилган. Шунингдек, мураббий билан мулоқот қилган пайтимизда ўзимнинг камчиликларим ҳақида ҳам гаплашдик. Агар камчиликларимни тўғриласам, янада юқори даражада футбол ўйнашим мумкин.

- “Навбаҳор” номи чиққан футболчиларни таркибга қўшиб оляпти. Селекцияда фаоллик кўрсатаётганини ҳамма эътироф этяпти. Шундан келиб чиқиб, вазиятга реал қарасак, клуб янги мавсумда нимага қодир?

- Кўриб турибсиз, “Навбаҳор”га жуда савияли футболчилар қўшилишди. Худо хоҳласа, клуб билан биргаликда чемпионликка ҳаракат қиламиз.

- Шунингдек, собиқ жамоангиз – “Қизилқум” ҳам яхши трансферларни амалга оширди. Сизнингча, навоийликлар “Навбаҳор”нинг асосий рақибларидан бири бўладими?

- “Қизилқум” ҳам яхши савиядаги ўйинчиларни олди. Ўйлашимча, бу йилги чемпионат жуда қизиқарли кечади. Бир қатор клублар кучли учталикка киришга ҳаракат қилишяпти. Умуман айтганда, ҳамма жамоаларни ўз олдига қўйган режа ва мақсадлари бор.