Мутахассис: “Сречко Катанец Россия билан ўйинашни истамаган эди, аммо”

Россия терма жамоасининг марказий осиё кубогида иштирок этмаслиги борасида расмий хабар эълон қилингач, кўплаб мутахассислар ўз фикрини билдирди. Таниқли футбол мутахассиси Алишер Никимбаев бундан мустасно эмас. Айни дамда, халқаро майдонда фаолият олиб бораётган ватандошимизнинг айтишича, Россиянинг Ўзбекистон билан ўйнагани Сречко Катанецнинг ғашини келтирган экан:

“Русларнинг  Марказий Осиё чемпионатида иштирок этишдан бош тортгани оддий қарор холос.

Унинг нима сабабдан содир бўлгани, таклиф рад этилганини аҳамияти йўқ. Россия футбол иттифоқи оғзига келган гапни гапириши мумкин. Иссиқ климат, зич тақвим, жамиятнинг турнирга негатив муносабати. Айни дамда, баҳоналарнинг қай бири эълон қилиниши муҳим эмас.

Хўш, унда нима муҳим? Россия футбол иттифоқи турнирда иштирок этиш учун расмий хат билан чиққан, аммо якунда контракт имзолашдан бош тортди. Энг қизиғи, хат юборилгач, берилган муддатдан 3 ҳафта ўтиб РФИ ўз режалари ўзгарганини эълон қилди. Аслида, CAFA 1 апрел санасидаёқ (Одамлар ҳазил деб ўйламасин деган маънода 2 апрел варианти ҳам бор) Россияни мусобақадан чиқариб юбориши лозим эди.

Улар ўзларини бегоналардек тутиш ўрнига, тарих ва қадрдонликка ишониб қолишди. Яъни, улар кеча тунгача сабр билан кутишди. Барча қилиниши керак бўлган навбатдаги қадамларни бир четга сурган холда сабр қилишди. Ҳомий излаш, қуръа ташлаш, тақвимни эълон қилиш, ТВ билан ҳамкорлик контрактлари, бошқа жамоани таклиф этиш ўрнига, Россияни кутиб туришни афзал кўрди.

Тўғриси, Марказий Осиё футбол ассоциацияси чемпионатида таркибига кирувчи бирор бир федерацияни РФИ ҳудди шундай сабр билан таклифини кутишини тасаввур ҳам қила олмайман. Манбаларимга тайиниб шуни айтишим мумкин-ки, Сречко Катанец Россия термаси билан ўртоқлик ўйинида иштирок этишни истамаган. Шунга қарамай, ноябрдаги баҳс бўлиб ўтиши учун сиёсий томондан босим бўлган.

Сени ҳурмат қилганларни ҳурмат қилиш адолатдан бўлади. Марказий Осиё чемпионати 2023-йилнинг июн ойида бўлиб ўтади. Россия терма жамоаси иштирок этмаса ҳам.",- деб ёзади Алишер Никимбаев ўз телеграм каналида.

Эслатиб ўтамиз, ҳозирча турнирда Ўзбекистон, Афғонистон, Эрон, Туркманистон, Тожикистон ва Қирғизистон терма жамоалари иштирок этиши аниқ бўлиб улгурган. Турнир  9-21 июнь кунларига белгиланган.