"Мухлисларимиз бизга бундеслига атмосферасини кўрсатиб беришди" ёхуд "Андижон" футболчиси Суперлигада дебютини ўтказди

Суперлиганинг иккинчи даврасига ҳам старт берилди ва “Андижон” 14-турда “Насаф”га қарши жанговар ўйинни ўтказди. Мазкур қарама-қаршиликда “Андижон” бош мураббийи Александр Хомяков иқтидорли футболчига Суперлигада дебют ўйинини ўтказиш имкониятини тақдим этди.

Гап Саидумар Содиқов ҳақида кетмоқда. У “Насаф”га қарши ўйиннинг 84-дақиқасида Сардор Абдунабиевнинг ўрнига захирадан майдонга туширилди. Шу тариқа, футболчи илк бор Суперлига баҳсида иштирок этди.

Умуман олганда, шу куни мезбонлар сафида 9 нафар маҳаллий ўйинчиларнинг тўп сурганини алоҳида таъкидлаш жоиз.

Ўтган йилдан бери “Андижон” шарафини ҳимоя қилаётан Саидумар Содиқов U-21 жамоамиз сафида тўп суриб келаётганини билсангиз керак. Аста-секин иқтидорли футболчи асосий жамоага жалб этилмоқда.

Саидумар “Андижон” матбуот хизматига дебюти ҳақида ўз таассуротлари билан ўртоқлашди.  

- Суперлигада дебютингиз “Насаф” билан ўйинга тўғри келди. Ўша куни майдонга тушишингизни кутганмидингиз?

- Суперлигадаги дебютимга келсак тўғриси кутгандим десам ҳам бўлади. Лекин ўйин вақтида майдонга тушишим ёки тушмаслигим борасида бироз иккилангандим. Худога шукрки, Суперлигада дебют ўйинимни ўтказишга муваффақ бўлдим.

- Бундай юқори атмосферада ҳаяжонландингизми ёки...

- Ҳа, албатта, бироз ҳаяжонландим. Бу табиий ҳол деб ўйлайман. Чунки стадионда қандай муҳит бўлганига ўзларинг ҳам гувоҳи бўлдинглар. Бизнинг мухлислар худди бундеслига атмосферасини бизга кўрсатиб беришди.

- Умуман, дебютингизни қандай баҳолайсиз ва мақсадингиз қандай?

- Дебютим омадли, бўлди деб ҳисоблайман. Мақсадим “Андижон” жамоасини совринли ўринларга олиб чиқиш. Албатта, ўз устимда ишлашни давом эттираман.

“Андижон” матбуот хизмати.