МЮ директори: Кэррик "Манчестер Юнайтед"ни юқори даражага олиб чиқишга қодир"

"Манчестер Юнайтед" ижрочи директори Омар Беррада жамоа бош мураббийи Майкл Кэррик ҳақида фикр билдирди.

Англиялик мураббий январь ойида Рубен Аморим ўрнига тайинланган эди. Мавсум охирида эса у муваффақиятли иши учун мукофотланиб, шартномаси 2028 йилгача узайтирилди.

"Мен Майклни аввал шахсан билмасдим, шунинг учун интервью вақтида илк бор учрашдик. У ҳақида кўп яхши гапларни эшитган эдим — уларнинг барчаси ҳақиқат экан.

У "Манчестер Юнайтед"ни яхши кўради, клуб қадриятларини тушунади ва инсонларни бошқара олади. Футболчиларнинг у ҳақидаги фикрлари ҳам ҳаммасини кўрсатиб турибди.

Кэррик кейинги икки йил ва ундан ҳам узоқроқ вақт давомида жамоа билан ишлаш ҳуқуқини тўлиқ оқлади. У ва унинг штаби МЮни юқори даражада ушлаб туриш учун барча имкониятга эга", — деди Беррада.

Эслатиб ўтамиз, "қизил иблислар" ўтган мавсумни Премьер-лигада учинчи ўринда якунлади.