МЮ собиқ футболчиси: Ҳусановнинг Жоао Педрога қарши ҳаракати пенальти бўлиши керакмиди?

"Манчестер Юнайтед" собиқ футболчиси ва ҳозир футбол эксперти сифатида фаолият олиб бораётган Гари Невилл Абдуқодир Ҳусанов ва Жоао Педро ўртасидаги тўқнашув ҳақида фикр билдирди.

“Бу футболнинг жуда субъектив ҳолатларидан бири. Агар яхшилаб қаралса, Ҳусанов аниқ Жоао Педрони туртиб юборади. Бу ерда тўпни тоза олиб қўйишга уриниш йўқ.

Қизиқ жиҳати шундаки, агар худди шу вазият жарима майдони ташқарисида содир бўлганида, ҳамма буни дарҳол фол деб айтарди. Эҳтимол, хавфли ҳужумни тўхтатгани учун сариқ карточка ҳам бериларди. Аммо жарима майдони ичида бўлгани учун ҳакамлар иккиланади, чунки қарорнинг оқибати катта бўлади. Шу сабаб бу 50/50 вазиятга айланади.

Агар ҳакам дарҳол пенальти белгилаганида, ВАР уни бекор қилмайди деб ўйлайман. Шу билан бирга, баъзи ҳакамларни ҳам тушуниш мумкин — улар катта ўйинларда фақат аниқ контакт бўлса пенальти беришни хоҳлашади.

“Челси” учун адолатсизлик бўлдими ? Мен бундай демаган бўлардим. Улар шунчаки омадсиз бўлишди. Чунки бошқа ўйин, бошқа ҳакам ёки жарима майдонидан ташқарида бўлса, бу деярли ҳар сафар фол сифатида бериларди,” — деди Невилл.

Маълумот учун, "Манчестер Сити" финалда кичик 1:0 ҳисобида ғалаба қозониб, Англия кубоги бош совринини қўлга киритди.