МЮ вақтинчалик бош мураббийликка янги номзод билан музокара ўтказди

Журналист ва инсайдер Фабрицио Романо Х ижтимоий тармоғида "Манчестер Юнайтед"нинг собиқ ярим ҳимоячиси Майкл Кэррик катта эҳтимол билан "қизил иблислар" бош мураббийи вазифасини бажарувчи Даррен Флетчер ўрнига вақтинчалик бош мураббий лавозимини эгаллаши ҳақида ёзди.

Манбага кўра, Кэррик INEOS ("Манчестер Юнайтед" раҳбариятидаги Британия компанияси) билан музокараларни муваффақиятли ўтказган ва "Манчестер Юнайтед" раҳбарияти билан ҳамкорлик қилиб, энди бу лавозимга номзодлар рўйхатида етакчилик қилмоқда.

Қайд этилишича, "Манчестер Юнайтед" шу ҳафта янги мураббий номини эълон қилади. Таъкидланишича, Керрик бу ишни олишга умид қилмоқда. Аввалроқ "қизил иблислар"нинг вақтинчалик бош мураббийлигига фаворит сифатида кўрилган норвегиялик Уле-Гуннар Сулшер ҳам раҳбарият қарорини кутмоқда.

5 январь куни клуб Рубен Аморим бош мураббийликдан кетганини эълон қилди. Португалиялик "Манчестер Юнайтед"да 2024 йилнинг 11 ноябридан 2026 йилнинг 5 январигача ишлаган.