Нагельсманндан кейин Германия терма жамоасини супермураббий бошқарадиган бўлди

Германия терма жамоаси раҳбарияти бош мураббий лавозимига немис мутахассиси Юрген Клопп номзодини кўриб чиқмоқда. Бу ҳақда Sky Sport Germany хабар берди.

Манба маълумотига кўра, "Ливерпуль"нинг собиқ бош мураббийи агар расман таклиф тушса, Германия футбол иттифоқи таклифини қабул қилишга тайёр. Шу билан бирга, амалдаги бош мураббий Юлиан Нагельсман билан ҳамкорликни давом эттириш эҳтимоли деярли қолмагани қайд этилмоқда, бироқ ҳали якуний қарор қабул қилинмаган.

Хабарга кўра, Германия терма жамоаси учун камида 1/8 финалга чиқиш вазифа сифатида қўйилган эди. Бу марра бажарилмагани сабаб, Германия футбол иттифоқи раҳбариятида Нагельсманга бўлган ишонч сезиларли даражада пасайган. Мураббийни истеъфога чиқариш варианти эса тобора реал сценарий сифатида кўрилмоқда.

Эслатиб ўтамиз, Германия терма жамоаси жаҳон чемпионатидан 1/16 финалдаёқ чиқиб кетди. Немислар Парагвайга қарши баҳсда асосий вақтни 1:1 ҳисобида якунлаб, пенальтилар сериясида 3:4 ҳисобида мағлуб бўлди.