“Наполи”: Осимхенни ўрнига зўр тўпурар топилди

“Наполи” раҳбарияти жамоа тўпурар Виктор Осимхен билан хайрлашишга тайёр. Аслида неаполликлар нигериялик форвардга янги шартнома таклиф қилмоқда.

Агарда Осимхен уни қабул қилмаса ҳам, “Наполи” ютқазмайди. Ёзда ўйинчини катта суммага сотиб юборади.

Осимхенга Англия грандлари қизиқмоқда. Улар 24 ёшли футболчи учун 140-150 миллион евро беришга тайёр. “Наполи” хўжайини 200 миллион евро атрофида пул олмоқчи.  

А Серия чемпиони ҳозирнинг ўзидан Осимхенга муносиб ўринбосар топиб қўйди. Агар Виктор кетадиган бўлса, ўрнига “Лилль”дан Жонатан Дэвид трансфер қилинади. 23 ёшли футболчи 60 миллион еврога баҳоланмоқда.

Қизиғи шундаки, “Наполи” Виктор Осимхенни ҳам “Лилль”дан сотиб олган эди. Ўшанда французларга 75 миллион евро тўланган.