"Навбаҳор" футболчисига Эроннинг "Истиқлол" клуби қизиқиб қолди

“Навбаҳор” клубининг тожикистонлик ярим ҳимоячиси Эхсони Паншанбега ҳамон четдан қизиқишлар бўлиб турибди. 

Бундан аввал, Паншанбега Россия клублари томонидан ҳам таклиф бўлгани ҳақида хабар бергандик. Жорий мавсум наманганликлар сафида 25 та ўйинда майдонга тушиб, 2 та гол муаллифига айланган ярим ҳимоячи энди эронликларнинг эътиборини ўзига қаратяпти.

Гап шундаки, барчамизга яхши маълум бўлган Эроннинг “Истиқлол” клуби “Навбаҳор” ярим ҳимоячисининг ўйинларини кузатиб келган ва унга қизиқиш билан қарамоқда.

Бу борада “Истиқлол” клуби ўзининг телеграм каналида пост қолдирган. Лекин “Истиқлол” клуби “Навбаҳор”га Паншанбе борасида расмий таклиф билан чиқдими, буниси ҳали номаълум. Шуни таъкидлаш керакки, футболчини наманганликлар билан яна бир йиллик шартномаси бор.