Cуперлига 23-туридан ўрин олган баҳсда Наманганнинг “Навбаҳор” жамоаси ўз майдонида Қаршининг “Насаф” клубини қабул қилади. Совринли ўринлар учун кураш олиб бораётган мазкур жамоалар ўртасидаги ўйиннинг кескин курашлар остида ўтиши эҳтимоли юқори.

“Навбаҳор”нинг тожикистонлик маҳоратли ярим ҳимоячиси Амирбек Жўрабоев бўлажак учрашув борасидаги фикрлари билан ўртоқлашди. Бу ҳақда клуб матбуот хизмати хабар берди.

- Бизни олдинда жуда муҳим ўйин кутиб турганлигини барчамиз тушуниб турибмиз. Бундан ташқари, ўз майдонимизда тўп сурамиз. Анчадан буён йирик ҳисобда ғалаба қозона олмаяпмиз ва кам гол уряпмиз. Мураббийларимиз машғулотларда ушбу камчиликни бартараф этиш устида иш олиб боришмоқда. Худо хоҳласа, бўлажак баҳсда ижобий натижага эришамиз, деган умиддаман.

Ўзбекистон кубогининг чорак финалидан ўрин олган ўйинда “Насаф”га ютқазиб қўйдик (0:1) ва ўз олдига юксак мақсад қўйган жамоамиз бу аламли мағлубият бўлди. Шу боис, бўлажак учрашувда қаршиликлардан ўша мағлубият учун ҳам реванш олиб, мухлисларга қувонч улашамиз, деган ниятдаман.

“Насаф”га қарши кечадиган ўйинда мухлислардан жамоамизни 12-ўйинчи сифатида бевосита стадионда қўллаб-қувватлашларини сўрайман.

Бу эса бизга қўшимча куч-қувват бағишлайди ҳамда ишқибозларга байрам кайфиятини улашиш учун майдонда барча имкониятимизни ишга соламиз, - деди футболчи.