"Навбаҳор" ўртоқлик ўйинида йирик ҳисобда ғалаба қозонди

“Навбаҳор” – “Андижон-SGS” – 6:1 (1:1)

Наманган. “Марказий” стадиони. 109 томошабин.     

Ҳакамлар: Исроилжон Имомназаров, Исломжон Носиров, Азизбек Зокиров.

Назоратчи: Игорь Нехочин.

Голлар: Музаффар Мўминов (23), Темурхўжа Абдухолиқов (50,52,58), Тома Табатадзе (64), Фаррух Икромов (69) – Ўктам Абдумаликов (2) 

Давралар оралиғидаги танаффус пайтида футболчиларнинг жисмоний ҳолатларини маромида ушлаб туриш мақсадида, “Навбаҳор” жамоаси бугун “Андижон-SGS” жамоасига қарши назорат-синов баҳсини ўтказди. Унда Самвел Бабаян шогирдлари йирик – 6:1 ҳисобида ғалаба қозонишди.

Таъкидлаш жоизки, мазкур беллашувнинг 1-бўлимида майдонда асосан ёш футболчилар ҳаракат қилишди. Асосий таркибдан эса 3-4 нафар футболчи майдонга тушди, холос. 

Шу боис, бўлса керак, беллашувни фаол тарзда бошлаган андижонликлар 2-дақиқадаёқ Ўктам Абдумаликовнинг голидан сўнг, ҳисобни очишга муваффақ бўлишди - 0:1.

Албатта, учрашувнинг бундай тус олиши мезбонларни қониқтирмасди. Натижада ҳужумкорликни кучайтирган “лочинлар” 23-дақиқада стандарт вазиятдан сўнг, ҳисобни тенглаштиришди.

Ўша вазиятда Шодиёр Шодибоев бурчак зарбасини Музаффар Мўминов билан тўпни ўзаро ўйнаган ҳолда, амалга оширди. Шодибоевдан иккинчи марта тўпни қабул қилиб олган Мўминов рақиб жарима майдончаси ичига ёриб кирган ҳолда, кучли зарба йўллаб, меҳмонлар дарвозасини аниқ нишонга олиб, жамоаларнинг танаффусга 1:1 ҳисобидаги дуранг натижа билан чиқиб кетишини таъминлади. 

Иккинчи бўлимни фаол тарзда бошлаган майдон эгалари 58-дақиқага келиб, 31 ёшли тажрибали ҳужумчи Темурхўжа Абдухолиқовнинг 8 дақиқа  ичида амалга оширган “хет-трик”и эвазига ҳисобнинг йирик – 4:1 кўриниш олишини таъминлашди. 

Шундан сўнг, “Навбаҳор” устози Самвел Бабаян захирадан майдонга асосий таркибнинг қолган футболчиларини туширди.

Бу эса ўз самарасини бериб, олдинига "Навбаҳор" таркибига яқинда қўшилган грузиялик ҳужумчи Тома Табатадзе ўз номига гол ёздириб қўйган бўлса, 69-дақиқада Фаррух Икромов якуний ҳисобнинг 6:1 кўриниш олишини таъминлади.

“Навбаҳор” ПФК матбуот хизмати.