"Навбаҳор" устози "Металлург"дан учралган мағлубиятга изоҳ берди

Суперлига 18-туридан ўрин олган “Металлург” – “Навбаҳор” учрашувидан сўнг, дастлаб “Навбаҳор” бош мураббийи Деян Журжевич ОАВ ходимларининг саволларига жавоб берди. Бу ҳақда "Металлург" матбуот хизмати хабар берди.

- Жуда аламли тарзда мағлубиятга учрадик. Учрашувнинг биринчи бўлими деярли тенг курашлар остида кечган бўлса, иккинчи бўлимда устунлик жамоамиз тарафида бўлди ва йигитларда 4та ажойиб голли вазият юзага келди. Аммо шогирдларим улардан фойдалана олишмади. Мезбонлар эса сўнгги дақиқадаги жарима зарбасидан гол уриб, ғалаба қозонишди. Шундай экан, ушбу мағлубиятни аламли дейишдан бошқа иложим йўқ.

АГМКга қарши кечган баҳсда ҳам жарима зарбасидан сўнг, тўп ўтказиб юборгандик. Бугунги ўйинда ҳам ушбу ҳолат такрорланди. Йигитлар кўплаб хавфли вазиятларни юзага келтиришмоқда. Аммо улардан фойдаланиш самарадорлигида оқсаяпмиз. Мазкур учрашувда ҳам шу нарса жамоамизга панд берди, - деди мураббий.