"Навбаҳор"да йиғилиш ўтказилди (Фото)

Бугун Наманган шаҳридаги “Марказий” ўйингоҳида клуб раҳбарияти, шунингдек, жамоаси мураббийлар штаби, “Навбаҳор-фарм”, U-21 ва U-18, бундан ташқари, футзал ҳамда аёллар жамоалари мураббийлари иштирокида йиғилиш бўлиб ўтди. Бу ҳақда клуб матбуот хизмати хабар берди.

Йиғилишни “Навбаҳор” ПФК директори Бахтиёр Нурматов олиб борди. У ўз нутқида Ўзбекистон Профессионал футбол лигаси ва Санитария-эпидемиологик осойишталик агентлиги билан келишилган ҳолда тасдиқланган COVID – 19 пандемияси даврида чеклаш тадбирларини қўлланиши шароитида профессионал футбол машғулотлари ҳамда мусобақаларини ташкил қилиш тўғрисидаги вақтинчалик санитария-гигиена қоидалари ва меъёрларига амал қилиш бўйича барча мураббийларга тушунтириш берди.

Шунингдек, Б.Нурматов барча жамоалар юқорида келтирилган қоидалар ҳамда меъёрларга амал қилган ҳолда машғулотлар ўтказишини ҳам таъкидлаб ўтди.

Кун тартибидаги масалалар бўйича “Навбаҳор-фарм” бош мураббийи Рашид Ғофуров, “Навбаҳор” аёллар жамоаси бош мураббийи Карима Юлдашева ва “Навбаҳор” футзал жамоаси бош мураббийи Хуршид Тожибоев ўз фикр ҳамда мулоҳазаларини билдириб ўтишди.