“Навбаҳор”нинг ўйинларига қанча мухлис ташриф буюрди?

Хабарингиз бор, пандемия сабабли, Суперлиганинг кўплаб ўйинлари, аниқроғи, 4-18-турлардан ўрин олган баҳслар томошабинларсиз ўтказилди. Шундай бўлса-да, “лочинлар”нинг якунланган мавсумдаги ўйинларига ташриф буюрган мухлислар сонига эътибор қаратишни лозим топдик.

Якунланган мавсумда “Навбаҳор” ўйинларига жами 60981 нафар томошабин ташриф буюрди. Эътиборлиси, Намангандаги баҳсларга 29104 нафар, сафардаги ўйинларига эса 31877 нафар ишқибоз ташриф буюрган.

Бироқ, шуни ҳам таъкидлаш жоизки, Суперлиганинг дастлабки 3 та турида ҳали юртимизда пандемия бошланмаган ва ўша учрашувларда томошабинлар сони ҳам чекланмаганди (19 – турдан бошлаб, стадионларга чекланган миқдордаги мухлисларнинг ташриф буюришларига рухсат этилди). Айтиш жоизки, дастлабки 3 та турнинг иккитасини “лочинлар” сафарда, яъни “Пахтакор”га қарши Тошкент ҳамда “Андижон” билан Андижонда ўтказишган, мазкур шаҳарларга ҳам Намангандан ҳам кўплаб мухлислар ташриф буюришганди.

Таъкидлаш лозимки, “Навбаҳор”нинг илк 3 та турдаги ўйинларига жами 55800 (!) нафар ишқибоз ташриф буюрди. Шунингдек, Суперлиганинг якунланган мавсумида бир учрашувда энг кўп мухлис тўплаш бўйича рекорд ҳам жамоага тегишли. Суперлиганинг 2-туридан ўрин олган ва 6 март куни Намангандаги “Марказий” ўйингоҳда бўлиб ўтган “Навбаҳор” – “Локомотив” баҳсига 25328 (!) нафар томошабин ташриф буюрганди.