"Нефтчи" клубининг мухлислар билан учрашуви ўтказилди

Ўз олдига доимгидек катта мақсдаларни қўйган "Нефтчи" клуби 14 март куни ўз майдонидаги дастлабки расмий учрашувда майдонга тушади. Ушбу баҳс олдидан жамоа аъзоларининг мухлислар билан учрашуви уюштирилди.

Фарғонадаги "Ислом Каримов" номидаги санъат саройида "Нефтчи" футбол клубининг янги мавсумга тақдимот маросими тантанали равишда ўтказилди. 

Тантана бошланишидан олдин футбол академияси тарбияланувчилари ва фан клуб аъзолари "Нефтчи" жамоасини ранг баранг шиорлар ва қувончли ҳайқириқлар остида кутиб олдилар. Мажлислар залида ўтказилган маросимда "Нефтчи"нинг клуб раҳбарлари, мураббийлар, вилоят ҳокимлиги ва спортга алоқадор ташкилотларнинг масъул ходимлари, оммавий ахборот воситаларининг вакиллари иштирок этдилар. Уларнинг гулдурос қарсаклари остида вилоят ҳокими, вилоят футбол ассоциациясининг президенти Ҳайрулло Ҳайитбаевич Бозоров сўзга чиқиб, жамоа аъзоларини янги мавсум бошланиши билан қизғин табриклаб, уларга ўтган йиллардагидан кўра юқори натижаларга эришиш, ҳар бир учрашувда мухлисларни қувонтириш, бунинг учун эса спорт маҳоратлари ва куч-қудратларини биргаликда намойиш этиш каби тилакларини изҳор этди.

"Мухлислилар яъни сизлар билан биз ҳамиша жамоа билан бирга бўлишимиз, уни ҳар жиҳатдан қўллаб қувватлашимиз, кўнглини кўтаришимиз ва шу тариқа кўзланган юксак маррага албатта эришишимиз мумкин. Мен бугун, —деди ҳоким," Олға Нефтчи, биз биргаликда қудратли кучмиз", деб ўз сўзимни  якунламоқчиман".

Ҳоким табригидан сўнг тантанага йиғилганлар машҳур санъаткорлар иштирокида ташкил этилган консерт дастурини мириқиб томоша қилдилар. Концертда Яхё Мўминов, Отабек Муҳаммадзоҳид, Илҳом Иброҳимов, Қиличбек Мадалиев сингари ўзбек қўшиқчилигини юксалтиришга муносиб ҳисса қўшган донгдор санъаткорларнинг чиқишларини залда тўпланганлар гулдурос қарсаклар билан қўллаб-қувватлаб турдилар.