"Neftchi" "Paxtakor"ga qarshi Toshkentdagi o‘yinga o‘zgacha "nastroy"da keladi!

Xabaringiz bor, 15-turdan o‘rin egallagan markaziy bahs Toshkentda bo‘lib o‘tadi. Unda amaldagi chempion "Paxtakor" o‘z uyida Farg‘onaning "Neftchi" klubi bilan kurash olib boradi. Jamoalar o‘rtasidagi birinchi bahsda "yo‘lbarslar" 2:1 hisobida g‘alaba qozongani ko‘pchilikning yodidan ko‘tarilmagani aniq. Bir necha kundan so‘ng ushbu match uchun revansh olish imkoniyati "sherlar"da bor.

SPORTS.uz jurnalisti Yahyoxo‘ja Ulug‘xo‘jaev o‘z telegram kanalida ushbu bahsga "Neftchi" o‘zgacha tayyorgarlik ko‘rayotgani borasida post qoldirdi. Unga ko‘ra, Farg‘ona hokimi "yo‘lbarslar" bilan uchrashgan va Toshkentdagi o‘yinda ijobiiy natija kutayotgani borasidagi fikrlarini bildirgan:

"Neftchi" klubi qarorgohida Farg‘ona viloyati hokimi mehmon bo‘ldi. Ma’lum bo‘lishicha, Xayrulla Bozorov Toshkentda bo‘ladigan "Paxtakor"ga qarshi o‘yin oldidan jamoaning ichki muhiti bilan qiziqqan. Shuningdek, "yo‘lbarslar"dan amaldagi chempion bilan bo‘ladigan mehmondagi o‘yinda yaxshi natija kutayotganini yashirib o‘tirmagan.

Qisqasi, "Neftchi" Toshkentga "Paxtakor" ustidan g‘alaba qozongani tashrif buyurmoqchi. "Sherlar" esa kechagi Samarqanddagi alamli mag‘lubiyatdan so‘ng "ko‘zi qongga to‘lgan" holatda. 5 avgust kuni Toshkentda "yo‘lbars" va "sher" o‘rtasidagi qahshatqich jang bizni kutib turibdi."

Ushbu o‘yinga bo‘lgan munosabat kubok bahsidagi "Paxtakor"ning kutilmagan mag‘lubiyati o‘rtadagi keskinlikni oshirib yuborgani rost. SPORTS.uzga ma’lum bo‘lishicha, Farg‘ona viloyati hokimi futbolchilarga Toshkentdagi g‘alaba uchun yaxshgina mukofot va’da qilgan. "Paxtakor" esa Samarqanddagi alamli mag‘lubiyat sababli Toshkentda "Neftchi"ni ikki hissa agressiv qabul qilishi turgan gap.

15-turning asosiy bahsi sanalgan o‘yin 5 avgust kuni soat 20:00 da "Paxtakor" stadionida bo‘lib o‘tadi. Hali biror marotaba mag‘lubiyatga uchramagan "Neftchi" uchun Toshkent safari qanday yakun topadi, deb o‘ylaysiz? Fikrlaringizni izohlarda qoldiring!