"Нефтчи" қайтмоқда (видео)

Лигада жон сақлаш йўлида кураш олиб бораётган "Нефтчи" жамоаси бу тур ўз майдонида "Насаф"ни қабул қилди.

Фарғонадаги "Истиқлол" стадионида кечган учрашув мезбонларнинг 3:1 ҳисобидаги ғалабаси билан поёнига етди.

7-дақиқада Авазбек Ўлмасалиев ҳисобни очди. Орадан 15 дақиқа ўтар-ўтмас Ислом Рашидхонов чиройли зарба билан рақиб дарвозасини ишғол этиб, мувозанатни тиклади.

Тайм сўнггида "аждарлар" посбони Санжар Қувватов билан бирга-бар вазиятга чиқиб борган Шерзод Ҳакимов дарвозабоннинг устидан тўпни ошириб ташлади ва фарғоналикларни ҳисобда олдинга олиб чиқди.

Учрашувга якуний нуқтани эса Достонбек Тошматов қўйди - 3:1, "Нефтчи" фойдасига. Мазкур  ғалаба эвазига Баҳром Ҳайдаров шогирдлари ўз очколари сонини 13 тага етказиб олишди ва сўнгги ўринни тарк этишди.

Қуйида эса ушбу ўйин видеошарҳи билан танишиш имконига эгасиз.