“Нефтчи” сўнгги бор қачон “Пахтакор”ни Тошкентда мағлуб этган? Ўйин олдидан энг муҳим маълумотлар билан танишинг

Хабарингиз бор, бугун Тошкентда футболимиз классикоси бўлиб ўтади. “Пахтакор” ўз уйида мағлубият нима эканлигини билмай келаётган “Нефтчи” билан кураш олиб боради. Баҳс олдидан жамоалар ўртасидаги ўйинлар тарихига назар соламиз. 

Шу кунга қадар жамоалар 57 марта ўзаро тўқнаш келган. Уларнинг 27 тасида “Пахтакор” ғалаба қозонган бўлса, 21 баҳсда фарғоналикларнинг қўли баланд келган. Яна 10 та ўйинда томонлар муроса кўчасини танлаган. Тўплар нисбати 95:69, “шерлар” фойдасига. Тўқнашув тарихидаги энг йирик ғалаба “Пахтакор” жамоасига тегишли бўлиб, ўшанда тошкентликлар рақиб дарвозасига жавобсиз 6 бор тўп киритган. “Нефтчи” эса 4:0 натижасидаги йирик ғалабаси билан мақтана олади. Жамоалар тарихидаги энг йирик дуранг 2010 йилда бўлиб ўтган баҳсда қайд этилган. Ўша куни таблода 3:3 ҳисоби порлаган. Жорий мавсум бошида (2-турда) Фарғонада бўлган сўнгги ўйинда “Нефтчи” 2:1 ҳисобидаги ғалабани қўлга киртгани кўпчиликнинг ёдидан кўтарилмагани аниқ. “Нефтчи” сўнгги бор Тошкентда 2016 йилнинг 12 август санасида ғалаба қозонган. 

Айни дамда, турнир жадвали қуйидагича кўриниш олган.

Рақибларига нисбатан камроқ ўйин ўтказганига қарамай, “Пахтакор” биринчи поғонани қўлга киритиш имкониятига эга. “Нефтчи” ортда қолган 14 ўйин давомида мағлуб бўлгани йўқ. 7 ғалаба ва 7 дуранг уларнинг кучли учликда бўлишини таъминламоқда. “Пахтакор” эса 13 ўйинда 10 ғалаба, 1 мағлубият ва 2 дуранг билан иккинчи поғонада бормоқда. Шунга қарамай, “шерлар”ни захирада яна бир ўйини мавжуд. “Шерлар” “йўлбарслар”ни мағлуб эта олса, кеча дуранг ўйнаб муҳим очкодан маҳрум бўлган “Навбаҳор”ни қувиб ўтиб, биринчи поғонага кўтарилиш имкониятини қўлга киритади. 

Тахминий таркиб:

“Пахтакор”: Қувватов, Алижонов, Азмиддинов, Черан, Ҳамралиев, Ҳамробеков, Холматов, Собирхўжаев, Сайфиев, Турғунбоев, Банашак. 

“Нефтчи”: Назаров, Адҳамзода, Жўрабоев, Ғофуров, Ғуломов, Ғофуров М, Ҳошимов, Муҳиддинов, Никабадзе, Тўраев, Убайдуллаев.

Баҳс бугун соат 20:00 да старт олади. Ўйинни Спорт телеканали жонли эфирда намойиш этади. Баҳсни матнли трансляцияси эса SPORTS.uz сайтида олиб борилади. Ўйинни биз билан кузатинг!