"Нефтчи"нинг Қаршидаги ғалабаси сенсациями? "Насаф"ни чемпионликдан маҳрум этдими? Левченко Бердиев жамоасини қандай мағлуб этганини айтди

Сўнгги тур олдидан барчаси остин-устун бўлиб кетди-а? Ҳаммаси Қаршидаги ўйин билан боғлиқ бўлди.

25-тургача 1-ўринда бораётган ва чемпионлик учун барчаси ўз қўлида турган “Насаф” клуби Қаршида “Нефтчи”га 0:1 ҳисобида мағлубиятга учраши эвазига бирданига 3-ўринга тушиб қолди. Бундан “Пахтакор” билан “Навбаҳор” унумли фойдаланиб қолишди.

“Насаф”нинг ушбу қоқилиши кўпчилик учун кутилмаган ҳолат сифатида баҳоланяпти. Нега деганда, қаршиликлар чемпионлик йўлида ўз майдонидаги имкониятни қўлдан бой бермаса керак, деган тахмин янграётганди. Бироқ “Нефтчи” мағлубиятга асло рози бўлмади ва ўз ўйинини намойиш этиб, “Насаф” майдонидан қимматли уч очкони қўлга киритди.

“Нефтчи” Виталий Левченко қўлига ўтганидан кейин анча ўзгарди. У жамоани қийин вазиятдан олиб чиқиб кета олди. Натижада энг муҳими – Суперлигада қолиш вазифасини бажарди. Чемпионлик учун биринчи рақамли даъвогар бўлиб турган “Насаф” майдонида ғалаба қозонгани эса яна бир карра Левченконинг салоҳиятидан дарак бермоқда.

Ўйиндан сўнг “Нефтчи” устози Sports.uz мухбирининг саволларига жавоб қайтарди.  

- “Нефтчи”нинг “Насаф” майдонидаги ғалабасини сенсацияга қиёслаш мумкинми?

- Сенсация бўлиши мумкин. Лекин биз ушбу ўйинга тўлиқ эътиборимизни қаратган ҳолда жиддий тайёрлангандик. Бунгача “Навбаҳор”, “Металлург” ҳамда АГМК клублари билан учрашувларда ҳам яхши ҳаракат қилгандик. Лекин ўша баҳсларда очко қўлга кирита олмагандик. Шу сабабли бу сафарги учрашув биз учун муҳим эди.

- Жамоангизнинг ғалаба қозониши учун қандай сўзларни ишлатдингиз?

- Ҳар бир ўйиндан олдинги назарий машғулотларда рақибнинг кучли томонларини ўрганамиз. Бу сафар ҳам шундай қилдик. Менинг ҳисобим бўйича ютишимиз керак эди. Буни уддаладик.

- “Насаф”ни чемпионликдан маҳрум қилдик, деб ўйлайсизми?

- Бирор нарса дея олмайман. Мамлакат чемпиони ким бўлишини охирги тур ҳаммасини ҳал қилиб беради.

- Сизнингча, чемпионлик кимга насиб қилади?

- Қайси клуб чемпион бўлмасин, футбол майдонида адолатли курашган бўлади.

- “Насаф”га қарши беллашувда жамоангиздаги энг яхши футболчи деб кимни айта оласиз?

- Лутфулла Тўраев.

- Умуман айтганда, “Насаф” ўйини билан сизни ҳайрон қолдирдими?

- “Насаф” яхши ўйин намойиш этди. Ажойиб шакллаган ва замонавий услубда ўйнаб келмоқда.

- Келаси йил учун режалар тузяпсизми?

- Режа тузишдан олдин вилоят ҳокими билан учрашиб, жамоанинг келгуси ривожлантириш йўлидаги мақсадлари ҳақида муҳокама қилиб олишимиз керак.

Шуҳратбек Жўраев.