Нега ҳамма "Пахтакор" мураббийи кетиши кераклиги ҳақида гапирмоқда?

Суперлигада интрига авжида. Осиё Чемпионлар лигасида иштирок этган жамоалар яна курашга қўшилди. Кўпчилик "шерлар"нинг ОЧЛдаги муваффақиятсизлиги туфайли мураббий истеъфога чиқарилиши кераклигини, чемпионатни бошқа - маҳаллий мураббий билан якунласа ҳам бўлишини айтмоқда.

Лекин бу ечим бўлишига ишониш жуда қийин. Пойтахтликларнинг мағлубиятлари мураббий сабабли эмас. Агар жамоа вазиятлар ярата олмаганда, олдинга ўтишда қийналганда шундай фикрни илгари суриш мумкин эди. Бироқ вазиятлар ҳам яратилди, имкониятлар ҳам бўлди. Фақат футболчиларнинг ўзлари гол ура олмади. Мураббийнинг ўзи майдонга тушиб гол урмайдику.

Яқиндаги "Пахтакор"нинг собиқ футболчиси Жалолиддин Машарипов SPORTS.uz сайтига берган интервьюсида Ўзбекистон миллий терма жамоасининг жаҳон чемпионати саралашидаги муваффақиятсизлигида фақат мураббий айбдор эмаслигини айтганди. Чунки майдонда футболчилар ҳаракат қилиши, голни улар уриши кераклигини айтганда, у ҳақ эди. Тактика ва футболчиларнинг майдондаги жойлашуви ҳақида мураббий ўйлайди. Қолганини майдонда футболчилар бажаради.

Суперлигага келсак, рақобат юқори. Турнир жадвалида охирги йилларда йўқолиб бораётган интрига кўриняпти. Бошқа жамоалар кучаймоқда. "Пахтакор" очколарни бой бермоқда. Чемпионнинг ҳам йўқотишларга учрашуви оддий ҳол аслида. Бошқаларнинг кучайиши фонида "шерлар"нинг қоқилиши фожеага айланмоқда...

Бу мавсумдаги чемпионатимиздан кўп нарса кутиляпти, камида 7-8 тур аввал чемпион номи аниқ бўлмаслигини. Аммо аксарият инсонлар "Пахтакор" очко йўқотмаслиги, мағлубиятга учрамаслиги керак, деб ҳисоблайди. Эътиборлиси, журналистлар ҳам шундай фикрда. Ҳудди "Пахтакор" очко йўқотса, ҳазм қила олмайдигандек. "Шерлар" очко йўқотса, ёмонми?

Мураббийга вақт керак. Арвеладзе келганда ҳам шундай эди. У ҳам танқид остида қолганди. Лекин раҳбарият ишонди ва имконият берди. Якунда натижани кўриб турибсиз. Славче Войнескини ҳозир лавозимидан озод қилинса, янги келган мураббий ўзини намоён қилиши қийин бўлади. Чунки таркибни бу мутахассис йиғган. Арвеладзедан қолган ўйин услубини йўқ қилиб юбормагандир, балки ўзининг билимларини амалда қўллаб кўриши керак. Янги келган мураббийнинг ишига баҳо бериш қийин бўлади. Чунки янги мураббийнинг салоҳиятини кўрадиган ОЧЛ янги мавсуми 2023 йилнинг куз ойларида бошланади. Фақатгина Суперлига баҳслари орқали имкониятларини билиб олиш мушкул. Шунинг учун Славчега ҳозирча вақт керак. Камида биринчи давра охиригача.

Бекзод ИСАЕВ