Нодирбек Абдусатторов: «Чемпионлик сари катта қадам ташладик»

Ўзбекистон 46-Бутунжаҳон шахмат Олимпиадасининг 7-турида Хитойни ишончли тарзда мағлуб этди. Биринчи доскада Дин Лижэнни енгган Нодирбек Абдусатторов учрашувдан сўнг ФИДЕга интервью берди.

Хитойга қарши баҳс ҳақида:

«Албатта, оғир кураш бўлишини кутгандик. Аммо ҳаммаси анча тез ҳал бўлди. Дебютдан сўнг жуда ёқимли позицияга эга бўлдим. Қолган доскаларда ҳам вазият жамоамиз учун қулай эканини кўрдим. Менимча, бугун ҳеч бир доскада муаммога дуч келмадик.

Ҳиндистонга қарши баҳс билан солиштирганда, бу анча осон кечган учрашув бўлди. Жуда тоза ўйин намойиш этганимиздан хурсандман. Ўйлайманки, бу ғалаба чемпионлик сари катта қадам бўлди».

Ҳиндистонга қарши баҳс вақтидаги жамоа чати ҳақида:

«Биз мессенжерда жамоа бўлиб ёзишиб турдик. Ниҳал хато қилганида, чатда катта шовқин кўтарилди. Ҳамма ёзар, бақирарди — бу ақлбовар қилмас ҳолат эди. Бизга омад кулиб боқди. Менимча, бу Олимпиаданинг ҳал қилувчи лаҳзаси бўлиши мумкин».

Абдусатторовнинг айтишича, Ниҳалнинг хатосига қадар чатда сукут ҳукм сурган ва жамоа аъзолари фақат партияларни кузатиб борган.

Мухлислар ва қўриқлаш хизмати ҳақида:

«Жуда катта оломон бўлишини кутгандим. Матбуот анжуманида ҳам шахматга бўлган бундай иштиёқни фақат икки мамлакат — Ҳиндистон ва Ўзбекистонда кўрганимни айтгандим.

Бизнинг ОАВ ва мухлисларимиз жамоа учун ишқибозлик қилишади ва ҳар бир партияни кузатиб боришади. Партиялардан кейин бизни кутиб олишлари футболчилар учун ҳам катта шараф. Менимча, бундай натижалар ва ўйин билан биз бунга тўлиқ лойиқмиз».