Нодирбек Абдусатторов Магнус билан бўлган баҳс ва турнир ҳақида ўз фикрлари билан ўртоқлашди

Хабарингиз бор, ҳамюртимиз Нодирбек Абдусатторов Блиц бўйича Жаҳон чемпионатининг финал босқичида Магнус Карлсенга имкониятни бой бериб, иккинчи ўринни эгаллади. Ушбу мағлубиятдан сўнг шахматчимиз кичик интервью берди.

— Нодирбек, жуда кескин баҳс бўлди. Таассуротлар қандай? Барибир жаҳон чемпионатида иккинчи ўрин — ажойиб натижа.

— Албатта, ўз чиқишимдан жуда мамнунман. Ростини айтсам, саралаш босқичида бироз омад ҳам келди — қўшимча кўрсаткичлар туфайли. Лекин финалга чиққаним ва қўлимдан келган барча ишни қилганимдан хурсандман. Якунда фарқ жуда кичик бўлди. Рақиб эса жуда кучли эди.

— Сен тўртликка кириш ниҳоятда қийин бўлганини айтдинг. Балки мусобақа формати ўзгартирилиши керакдир?

— Эҳтимол, шундайдир. Балки осонроқ бўларди. Аммо формат — формат. Бу ерда барчасини битта партия ҳал қилади, бу эса ҳар доим бироз тасодифий омилга боғлиқ. Қандай бўлиши кераклигини мухлислар ҳал қилса керак.

— Сен жуда яхши мусобақа ўтказдинг. Илк баҳсда барчаси сен фойдангга кечаётгандек эди, кейин эса жуда кескин партиялар бошланди. Сенимча, ҳал қилувчи палла қайси эди?

— Ўйлайманки, умуман олганда яхши ўйнадим. Иккинчи партияда рақиб ҳолатини бироз кам баҳолаб қўйдим — у ерда деярли тенгдек кўринарди, аммо маълум бир паллада у имконият топди. Сўнгги партия ҳам жуда кескин ўтди. Мен фаол ўйнашга ҳаракат қилдим, лекин устунликка олиб борадиган аниқ йўлни кўрмадим. Оқибатда ҳолат мен учун бироз ёмонлашди ва рақиб устунликни сўнггача етказа олди.

— Шунга қарамай, чиқишингдан розимисан?

— Албатта. Жуда мамнунман. Бу ажойиб кунлар бўлди, мусобақа ҳам жуда юқори даражада ўтди. Катта раҳмат.