Ноўрин пайтда эълон қилинган жарима, Қашқадарё ҳокимининг мотивацияси ва ҳакамлик ҳақида Бердиев билан интервью

ОФК кубоги учун сунъий майдонда тайёргарлик кўраётган «Насаф» жамоаси олдига қўйилган мақсадлар улкан. Қарши клубидан мухлислар халқаро мусобақада фақат олтин медаль кутмоқда. Хўш, бош мураббий катта турнир олдидан қандай фикрда? Жамоанинг кайфияти қандай? Шу ва бошқа саволлар билан Рўзиқул Бердиевни суҳбатга тортдик.

- «Насаф» машғулотларни тўлиқ таркибда бошлади. Йигитларнинг кайфияти қандай?

- Тўғри таъкидладингиз. Бизда ҳозир жароҳат олганлар йўқ. Ойбек Бозоров ниҳоят, машғулотларга қайтди. У жуда кўп ўйинни ўтказиб юборган эди. Ойбек қайтганидан жуда ҳам хурсандмиз. Кайфият аъло даражада. Клуб раҳбарияти томонидан ҳам илиқ сўзлар айтилди. Вилоят ҳокими ҳам бизни кузатиб қўйиш учун чиқди. Бу йигитларга катта мотивация берди десам, адашмаган бўламан. Мухлисларимиз ҳам бизни вокзалгача кузатиб қўйгани хурсанд қилди.

- Жамоа футболчиларининг аксарияти рўзадор экан

- Деярли барча футболчиларимиз рўза тутган. Бу бизнинг машғулотларимизга умуман халал бермайди. Улар бу орқали янада иродали бўлади.

- Туркман клуби мусобақага ташриф буюрмайдиган бўлди. Бу «Насаф»нинг фойдасига ишлайдими ёки зарарига?

- Биз 3 ўйинга режа қилган эдик. Ҳозир ҳаммасини бошидан ҳисоблаб чиқиш керак. Агар эртароқ маълум қилинганида, ички биринчиликда яна бир учрашувни ўтказган бўлар эдик. Ўйлашимча, барча жамоалар қатнашганида яхшироқ бўлар эди.

- «Насаф» жамоасини тарк этаётган футболчиларни ўрнини қандай қилиб бу тариқа осон тўлдирасиз? Бу сирни бир учини бўлсада ошкор қила оласизми?

- Бунда ҳеч қандай сир йўқ. Ҳозирги таркибдаги йигитлар яна қўшади. Бунга ишончим комил. Уларнинг салоҳияти юқори. Асосийси, бизнинг футбол мактабимизнинг очилиши клуб суягини ташкил этишга сабаб бўлган. Шу мактабда иқтидорли ёшлар бор. Биз шунчаки, уларни кўтаришимиз керак. Шунингдек, машғулотлар ўтказишимиз учун барча имкониятлар яратиб берилган. Клуб олиб борадиган сиёсат ҳам ёшларга қаратилган. Молиявий тарафдан бақувват эмаслигимиз учун бор имкониятдан тўғри фойдаланяпмиз.

- Ёш футболчилар билан ишлаш ёқимлими?

- Бу катта футболчи билан ишлашдан кўра ёқимлироқ. Сабаби, улар сиз бераётган кўрсатмаларни амалда кўрсатиб беради. Буни кўргач, сизнинг ишга бўлган эътиборингиз янада ортади. Академиядаги болаларга эътибор қаратиш орқали футболимизга наф келтириш ёқимли.

- Тажрибали футболчиларнинг бор бўлиши муҳим баҳсларда қўл келади. Айтингчи, «Насаф»га лидерларнинг йўқлиги муҳим баҳсларда панд бериб қўймайдими? Мисол учун, «Пахтакор» билан мавсум бошидаги тўқнашувда тажрибасизлик катта саҳнага чиққандек туюлди?!

- Олдинги йиллардан ҳам мисол келтиришим мумкин. Бундан аввалги авлодимиз клубни тарк этганида, биз 6-7 ўринларга қадар тушиб кетдик. Бир йил янги жамоа билан ишлаб, 2-поғонани забт этдик. Ҳозир яна бир авлодни олиб чиқдик. Буларга ҳам тажриба керак. Шу сабабли, «Пахтакор» ва АГМК билан ютиб турган пайтимизда гол ўтказиб юборяпмиз. Ўйлайманки, бу футболчиларим учун улкан мактаб бўляпти. Бир йилда яхши жамоа шакллантириш мумкин. Мавсум сўнгига қадар йигитлар янги даражага кўтарилади. Бунга қадар айтганингиздек, тажриба йўқлиги панд бериб қўйиши мумкин. Бу табиий ҳол. Мисол учун «Бунёдкор» билан ўйинни олайлик. Қулай вазиятларни ёшлар голга айлантиргани йўқ. Улар вазиятдан фойдалангани учун ғолиб чиқишди.

- Ўша учрашувдаги ҳакамлик ҳақида қандай фикрдасиз?

- Ҳамма кўрди бу ўйинни. Ўйлайманки, биз пенальти тепишимиз керак бўлган вазият тўп рақиб қўлига теккан эди. Негадир ВАРда Норчаевнинг йиқилгани кўрилди. Ваҳоланки, тўп «Бунёдкор» футболчисидан бориб қўлга текканди. Иккинчи гол пайтида офсайд бор эканлиги кўриниб қолди. Бунга кўпчилик амин бўлди, аммо ВАРнинг хулосаси ўзгача чиқди.

- Нима деб ўйлайсиз, нега «Насаф» билан кўп шундай воқеалар содир бўляпти?

- Тўғри айтдингиз, охирги пайтларда кўп жабр кўряпмиз. Буни кимдир атайин қиляпти, демайман, аммо биз шу ҳолатга тушиб қоляпмиз. Буни рад эта олмайман. Бундай ўйинлар ёш жамоага таъсир қилади, лекин биз ўзимизга келишимиз керак. Олдимизда масъулиятли ўйинлар кутиб турибди.

- Ҳозирги шогирдларингиз «Пахтакор»га кетаман деса, нима деб жавоб берасиз?

- Уларни «Пахтакор»га бермоқчи эмасмиз! (кулади). Менимча, бу йигитлар шартномаси тугагач, келажагини ўзи ҳал этиши шарт. Футболчиларга яхшироқ маош таклиф қилинса, уларни қўйиб юбормаслик нотўғри бўлади.

- Футболчиларингиз нима учун «Насаф»га боғланиб қолади? Шароф Муҳитдинов 3 ой клуб янги шартнома беришини кутиб турганини айтган эди

- Биринчи навбатда муҳитга боғлиқ. Биз уларни бир оила қилиб тарбиялаймиз. Оиладаги меҳрни олганлар бошқа жамоага боришни истамай қолади. Афсуски, молиявий сабаблар кўра, уларнинг аксарияти кетишга қарор қилади. Шундай бўлсада, шогирдларимнинг ҳеч бири бошқа жамоада «Насаф» ҳақида салбий фикр билдирмайди. Ишонасизми, агар Драган Черанга яхши таклиф берсак, у бизга қайтиб келишга тайёр. Уни талабини бажаришимиз жуда ҳам қийин, лекин имкон бўлганда жон, деб олган бўлар эдик.

- Нима деб ўйлайсиз, улкан мусобақа олдидан ЎФА эълон қилган жарима қай даражада ўринли бўлди? 50 миллион жаримани турнир якунида расман эълон қилиш яхшироқ эмасмиди?

- Тўғриси, бу қарор ҳаммамизни ҳайрон қолдирди. Ҳеч ким кутмаган эди. Бу инсон ЎФА ва клубимиз томонидан жазоланди. Гапингизга қўшиламан, муҳим халқаро ўйинлар олдидан бу жуда ҳам ўринсиз бўлди. Шунга қарамай, биз бор эътиборимизни олдиндаги ўйинларга қаратамиз. Олдимиздаги учрашувлар ҳаммасидан муҳим. Машғулотлар орқали муаммо ва босимни енгиб ўтамиз. Мухлисларимиз биздан ажойиб ўйин кутмоқда. Уларни уялтириб қўймаслигимиз шарт!

Яҳёхўжа Улуғхўжаев суҳбатлашди

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Akbarali Abdunazarov
08/05/2021 21:41
Насаф ешлари любой юлдузни чарчатади, шу йил хам камида 2 чи уринни олади худо хохласа, Черан хам Насафга 2 даврада келади худо хохласа,у насафни жуда хурмат килади, Узбекистонда энг баркарор клуб бу Насафдир, 2 чи даврага камида 3-4 яхши уйинчини олиб келади Бердиев, Черанни кайтиб келиши канчадан бери кутилмокда Кашкадареда!Албатта Черан шунча мухлиси бор жамоага жон деб келади!Черан Карши тебя ждёт, Насаф бу йил албатта ОФК кубогини олади ва клуб анча микдорда фойда куради, Черанга хам маблаг етади, Бердиев шуни хохлаяпти, Бердиев Демянинко килган ишни такрорлайди! Лайлатур кечасидан шуни сураб колади Каршилик мухлислар, колаверса барча Узбекистонликлар, УФАни хам узини ерик килади иншооллох!

Минбар

Барча блоглар