"Nurafshon" tarkibga yangi qo‘shilgan futbolchilarni tanishtirdi

Yaqinda nomi “Nurafshon” deya o‘zgartirilgan klub Usmon Toshev boshchiligida tayyorgarligini qizg‘in davom ettirmoqda.

Kuni kecha ayrim o‘yinchilar bilan shartnomalar imzolangani malum qilindi. Yodingizda bo‘lsa, yaqinda Sports.uz sayti orqali buxoroliklar safiga Tojikiston terma jamoasi hujumchisi, “Xo‘jand”da to‘p surgan Tohir Maladustov taklif qilingani xususida siz o‘quvchilarga xabar berib o‘tgandik. Unga ko‘ra, ushbu hujumchi yangi jamoasi safida 19-raqam ostida to‘p surishi ma’lum bo‘ldi. E’tiborlisi, “Nurafshon” tojikistonlik futbolchi bilan 2025 yilga qadar shartnoma imzoladi.

Shuningdek, jamoaga asli buxorolik hujumchi, oxirgi marta Farg‘onaning “Istilqlol” jamoasida harakat qilgan Firdavs Asadov ham taklif qilingan bo‘lib, shartnoma muddati 2023 yil oxirigacha amalda bo‘ladi. U mavsumning ikkinchi qismida “Nurafshon” tarkibida 22-raqamda o‘ynaydi.

Qolaversa, jarohati tufayli ancha vaqt davolangan himoyachi Bobur Omonov yana safga qaytdi. Klub esa u bilan 2021 yil oxiriga qadar yangi shartnoma imzoladi. Bekzod Saidov bilan ham 2022 yil yakuniga qadar kelishuvga erishildi. Ushbu futbolchilar 3 va 18-raqamlarni qabul qilib oldilar.

Shuningdek,  quyidagi futbolchilar bilan shartnomalar uzaytirildi:

Bexruz Shodmonov – 2022 yil oxirigacha

Anvar Jo‘raev – 2025 yil oxirigacha

Sardor Izzatov – 2025 yil oxirigacha

Hakimxon A’lamxonov – 2025 yil oxirigacha

Mirjalol Jumaev – 2025 yil oxirigacha

Shoxjahon Nasimov – 2025 yil oxirigacha

“Nurafshon” FK Qadamboy Nurmatov, Abdujamol Isroilov, Raxat Japarov, Azamat Isroilov va Qahramon Bahodirov bilan mehnat shartnomalarini bekor qildi. Shoxruh Xolmatov esa ro‘yxatdan chiqarildi.

Shu bilan birga “Nurafshon” klubi bosh direktori sifatida Farruh Hamroev ish boshladi. U bunga qadar Buxoro viloyati futbol assotsiatsiyasining vitse-prezidenti bo‘lib ishlgan. Usmon Toshev esa rasman bosh murabbiy rolida ro‘yxatdan o‘tkazildi.  

Buxoroliklar yozgi yig‘inni reja asosida o‘tkazib kelmoqdalar. Usmon Toshev o‘zining o‘yin uslubidan kelib chiqqan holda jamoani bo‘lajak bahslarga tayyorlab boryapti. Yig‘in davomida Superliganing ikkita jamoasi bilan nazorat uchrashuvi ham o‘tkazilgan. “Qizilqum” bilan kechgan uchrashuvda jangovor durang qayd etilgan – 3:3. Bundan tashqari, “Mash’al” bilan kechgan nazorat bahsida hisob ochilmagan – 0:0.