ОЧЛ. ОКМКнинг рақиби "Ал-Араби" ҳақида муҳим маълумотлар тақдим этилди

Осиё Чемпионлар лигаси плей-офф саралаш босқичида ОКМК Доҳада Қатарнинг "Ал-Араби" жамоаси меҳмони бўлади. Ушбу баҳс олдидан ОКМК матбуот хизмати ўйин ва рақиб ҳақида муҳим маълумотларни тақдим этди. 

"Ал-Араби" жамоаси 1952 йилда ташкил топган. "Ал-Араби" 7 карра Қатар чемпиони, 9 карра Қатар кубоги, 6 карра мамлакат суперкубоги ва Қатар лига кубоги соҳиби ҳисобланади.

Жамоа ўтган мавсум Қатар юлдузлар лигасида ОЧЛ плей-офф босқичига йўлланма берувчи 2-ўринни эгаллаган. Яқинда бошланган мавсумда эса бўлажак рақибимиз чемпионат 1-тури доирасида "Аш-Шамал"га қарши учрашувда дуранг натижа (1:1) қайд этди.

Ҳозирда "Ал-Араби" жамоасини маҳаллий мураббий Юнус Али бошқаради. Таркибда Рафинья Алкантара, Абду Диалло, Арон Гуннарссон ва Умар Ас-Сома сингари таниқли футболчилар тўп тепади.

"Ал-Араби" — ОКМК учрашуви 22 август куни Доҳадаги "Ат-Тумама" стадионида маҳаллий соат билан 20:30да, Тошкент вақти билан эса 22:30 да старт олади.

Осиё Чемпионлар лигаси 2023/24, плей-офф саралаш босқичи.

"Ал-Араби" (Қатар) — ОКМК (Ўзбекистон).

Бош ҳакам: Ко Ҳюнг Жин (Жанубий Корея).
Ёрдамчи ҳакамлар: Ёон Жае Еол, Парк Санг Жунг (Жанубий Корея).
Захира ҳаками: Парк Санг Жун (Жанубий Корея).
Ҳакамлар назоратчиси: Селеаражен Субраманиам (Малайзия).
Комиссар: Фаҳад Албаррак (Қувайт).