Олимпиадага тайёргарлик кўриш, оммавий спорт ва жисмоний тарбияни ривожлантириш бўйича олиб борилган ишлар муҳокама қилинади

Эртага, яъни 1 ноябрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги мажлислар залида матбуот анжумани ўтказилади. Бу ҳақда Жисмоний тарбия ва спорт вазирлиги матбуот хизмати хабар берди.

Манбада ёзилишича, анжуман Ўзбекистон Республикаси Президенти Шавкат Мирзиёев раҳбарлигида 2019 йил 4 сентябрь куни ўтказилган “2020 йилда Япониянинг Токио шаҳрида бўлиб ўтадиган Олимпиада ўйинларига тайёргарлик кўриш, оммавий спорт ва жисмоний тарбияни ривожлантириш бўйича олиб борилган ишлар натижадорлиги ва бу борада амалга ошириладиган долзарб вазифалар тўғрисида”ги 36-сонли видеоселектор мажлиси баёнида белгилаб берилган вазифалар ижросига бағишланади.

Унда Ўзбекистон Республикаси Жисмоний тарбия ва спорт вазирлиги ҳамда Миллий Олимпия қўмитаси мутасаддилари, шунингдек 2019 йилда Олимпия турлари бўйича жаҳон чемпионатларида юқори натижаларга эришган спортчилар ва оммавий ахборот воситалари ходимларининг иштирок этиши кўзда тутилган. Ўзбек спорт мутасаддилари ҳамда довруғи дунёга достон бўлаётган Баҳодир Жалолов, Шахобиддин Зоиров, Миразизбек Мирзахалилов сингари атлетларимиз қатнашадиган матбуот анжумани ўйлаймизки ҳеч кимни бефарқ қолдирмайди. Спорт соҳасида қалам тебратаётган барча журналистларни матбуот анжуманида кутиб қоламиз.