"Олимпик Мобиуз" бош мураббийи: "Тан олишимиз керак, про лигага кучимиз етмаяпти"

Про лиганинг 17-турида “Олимпик Мобиуз” ўз майдонида “Машъал”га 0:1 ҳисобида мағлубиятга учради. Беллашувдан кейин мезбонлар бош мураббийи Фарҳод Нишонов фикрлари билан ўртоқлашди.

- “Машъал”ни ғалаба билан табриклайман. Суперлигага чиқишини, ўз жойини топсин, омад. Тан олишимиз керак, бизни про лигага кучимиз етмаяпти. Тажрибасизлик, қаердадир ёшлик қиляпмиз. Лекин бугунги ўйинда ҳам кўрдинглар, чиройли футбол ўйнашди. Бунинг учун йигитларимга раҳмат айтаман. Охирги вазиятларда гол уришни якунловчи футболчи етишмаяпти. Улар ҳам аста-секин бўлади. Доим ютқазяпмиз, бироқ футболчиларим ўсяпти. Бугунги кун учун режа қилмаганмиз. Режамиз 4 йиллик. Ўйиндан-ўйинга ривожланишни кўряпман. Курашишини, ҳаракат қила олишини кўрсатиб беришди.

- Учрашув давомида жамоангиз кўп имкониятларни яратди. Бироқ фойдаланишга келганда оқсоқланишяпти. Бу бўйича қандай ишлар амалга ошириляпти?

- Тўғри, бу энг катта муаммо. Лекин биргина бизда эмас, ўзбек футболидаги муаммолардан биттаси. Биз бунинг устида ишлаяпмиз. Таҳлил қилиб кўряпмиз. Футболчиларимиз жисмонан, техник ва тактик жиҳатдан яхши натижа кўрсатишяпти. Аммо “ментальний” тайёр эмас. Шунинг ҳисобига ўзига бўлган ишонч йўқ. Натижада якуний зарбаларда тушунмовчиликлар келиб чиқяпти.