“Ўрмончи”лар “Сити” футболчиси трансферини ҳал қилди

Англия Премьер-лигаси бошланиши арафасида “Ноттингем Форест” таркибини “Манчестер Сити” футболчиси Жеймс МакЭйти билан кучайтирадиган бўлди.

Журналист Пол Тейлор ижтимоий тармоқдаги саҳифасида хабар беришича, “Ноттингем Форест” футболчининг трансфери бўйича музокараларни ижобий якунлаш арафасида турибди.

Бундан аввал 22 ёшли ҳужумкор ярим ҳимоячига “Эвертон” ҳам қизиқиш билдиргани ҳақида хабарлар тарқалган эди. МакЭйтининг “Манчестер Сити” билан шартномаси 2026 йил ёзигача амал қилади. Transfermarkt портали маълумотларига кўра, англиялик футболчининг баҳоси 20 миллион еврога тенг.

Жеймс МакЭйти “Манчестер Сити” тарбияланувчиси ҳисобланади. У клубнинг асосий жамоасида барча мусобақаларда жами 34 ўйинда иштирок этган ва 7 та гол урган.

“Шаҳарликлар” қарорига кўра, футболчи  2022-2024 йиллар давомида икки мавсум “Шеффилд Юнайтед” жамоасида ижара асосида ўтказган.