Ўруновни Европада кутишяптими?
Уч йил давомида Россия футболига мослашиб олган Элдор Шомуродов ўзини Европада нималар кутаётганини аниқ билмаса-да, ўзи учун мавҳум бўлган келажакни танлашга қўрқмади ва катта таваккал билан Италияга йўл олди.
Ҳаммамизга маълумки, Шомуродов “Женоа”даги бугунги мавқеига осонликча эришгани йўқ. Янги чемпионат, янги даража, янги талаблар, янги ўйин услублари, янги тил, янги турмуш тарзи. Ҳамма нарса янгича эди.
Шомуродов ўзбек футболчиси ҳам Европа футболида “йўқолиб” қолмаслигини исботлаб бўлди. Ўзбекистонлик мухлислар эса, Элдор каби “кўҳна қитъа” майдонларида тўп тепадиган футболчиларимиз кўп бўлишини истайди.
Гарчи “Спартак”да омади юришмаётган бўлса-да, Остон Ўрунов ҳам Европада порлаши мумкин бўлган футболчилардан ҳисобланади. Бунинг учун Остонда барча хусусиятлар етарли. Тўғри, ҳозир Россиянинг энг мураккаб клубида ишлари юришганича йўқ. Зотан, ўзбек футболчисига тузукроқ имкон ҳам берилмади.
Бош мураббий Доменико Тедеско ҳамюртимизни 14-24 январь кунлари Бирлашган Араб Амирликларида бўладиган дастлабки ўқув-машғулот йиғинига таклиф қилган бўлса-да, Ўруновнинг “Спартак”даги келажаги ноаниқ экани ҳеч кимга сир эмас.
Ҳамюртимизга Россиянинг ўзидан ҳам, Европадан ҳам таклифлар бўлаётгани айтилмоқда. Маълумотларга қараганда, “Удинезе” ва “Парма” Ўруновга қизиқиш билдирган экан. Бироқ, мутахассислар агар “Спартак” бу клублардан ҳам “Рубин”дан талаб қилгани каби ўзбек футболчиси учун 6 миллион евро сўраса, трансфер амалга ошмайди.
Умуман олганда, Ўруновни олмоқчи бўлаётган клубларни “Спартак”нинг “иштаҳаси” чўчитиб қўймоқда. Буни Остонга кўз тикаётган “Уфа” бош директори Ринат Шайбеков Metaratings.ru сайтига берган интервьюсида вазиятга ойдинлик киритииб ўтди.
- Ҳозир Остон Ўрунов ҳақида турли маълумотлар эълон қилинмоқда, жумладан, “Спартак” у билан хайрлашмоқчи экан. Сизда Ўруновни қайтариш варианти борми?
- Ҳозир, музокара ўтказмаяпмиз. Ўрунов жуда кучли ўйинчи ва хориждан бир неча клуб унга қизиқаётгани ҳам бор гап. Биз уни мамнуният билан ортга қайтаришни хоҳлаймиз, лекин мақсадимиз амалга ошмаслиги аниқроқ.
- Нега, буни тушунтириб бера оласизми?
- Менимча, “Спартак” бу футболчини биз олмоқчи бўлган суммага қўйиб юбормайди. Бизга Ўруновни кейинчалик унинг трансферини мақбул нархга харид қилиш ҳуқуқи билан ижарага олиш жуда маъқул вариант эди. Биз бунга қарши эмасмиз. Бу масалани агент билан ҳам, ўйинчи билан ҳам муҳокама қилдик. “Вазият жуда мураккаб”, дейишди.
- Остон Европада ўйнай оладими?
- Европа катта минтақа. Унинг ичига Болгария ва Словениядан тортиб, Англия ҳамда Испаниягача киради. Ўруновнинг Европада ўйнаб кетиши, унинг қаерга боришига боғлиқ.
Дарҳақиқат, “Уфа” Ўруновнинг Россия футболидаги биринчи жамоаси ҳисобланади. 2020 йилнинг бошида Тошкентнинг “Локомотив” жамоасида уфаликлар таркибига қўшилган Остон ўзининг креатив ўйинлари билан қатор клублар эътиборини қозонди.
Ҳозирча, Остон Ўруновнинг “Спартак”да қолиши ёки бошқа жамоага ўтиши мавҳумлигича қолмоқда.
Фикрлар