Ўруновни Россия футболига олиб кирган мураббий ишдан кетади

Россия премьер-лигасида иштирок этаётган “Уфа” бош мураббийи Вадим Евсеев ўз лавозимини тарк этиши кутилмоқда.

Ўтган чемпионатда чиройли ўйинлари билан мухлису мутахассислар эътиборини қозонган уфаликлар янги мавсумда ишончли оқлай олмаяпти. Бунга жамоанинг мавсумлар оралиғида етакчи футболчиларини бошқа жамоаларга трансфер қилгани сабаб бўлмоқда. “Уфа” раҳбарияти Остон Ўрунов, Даниил Фомин каби етакчилар ўрнига маҳоратли футболчилар топа олмади. Бу камчиликлар, энг аввало, натижаларда ўз аксини топмоқда. Европа миқёсидаги мусобақаларга йўлланма олиш учун курашиши кутилган “Уфа” премьер-лига жадвалида олти очко билан 15-ўринга тушиб қолган.  

Вадим Евсеевнинг ўзи ҳам ижтимоий тармоқлардаги саҳифасидаги постида кетишига ишора қилди.

- Ҳаёт дарёга ўхшайди. Эртами, кечми ўз ўзанидан чиқади. Одам ҳам бир жойда туравермайди, - деб ёзади бош мураббий.

Вадим Евсеев ҳамюртимиз Остон Ўруновнинг Россия футболидаги биринчи мураббийи ҳисобланади. Ушбу мутахассиснинг ишончи туфайли Ўрунов “Уфа”нинг асосий таркибида  ўз истеъдодини тўлиқ намоён эта олди ва  гранд клублар эътиборига тушди. Натижада Остон “Спартак” сафига қўшилди.