Осиё Кубогига оз қолди. Термамизни ушбу мусобақадаги иштироки тарихи ва бўлажак рақибларимиз ҳақида гаплашамиз

Хабарингиз бор, шу йилнинг 27 сентябридан 8 октябрига қадар Қувайтда футзал бўйича Осиё Кубоги бўлиб ўтади. Унда Баҳодир Аҳмедов бошчилигидаги Ўзбекистон терма жамоаси ҳам иштирок этади. Мусобақа бошланишига яқин ҳаяжон яна ҳам кучайиб бормоқда. Биласиз, термамиз Осиёдаги энг кучли жамоалардан бири ҳисобланади. Шундай экан, мақсад - чемпион бўлиш. Келинг, вакилларимизнинг ушбу турнирдаги ҳолати ҳақида батафсил тўхталиб ўтамиз. 

Ўзбекистон термаси мазкур мусобақанинг "B" гуруҳида Туркманистон, Тожикистон ҳамда Баҳрайн каби жамоалар билан баҳс олиб боради. 

Ўзбекистон - Туркманистон. 27 сентябрь 
Тожикистон - Ўзбекистон. 29 сентябрь 
Ўзбекистон - Баҳрайн. 1 октябрь 



Вакилларимиз саралаш босқичидаги 3 та учрашувда ҳам ғалаба қозониб, юз фоизлик натижа билан Осиё Кубогига йўл олганди. 

Ўзбекистон - Непал 5:1 
Афғонистон - Ўзбекистон 1:5 
Ўзбекистон - Тожикистон 5:2 

Кўриб турганингиздек, ҳамюртларимиз саралашнинг 3 ўйинида рақиб дарвозасини жами 15 бор ишғол қилиб, ўз дарвозасидан 4 та гол ўтказиб юборган. Ушбу беллашувларда Ихтиёр Ропиев, (4 та) Даврон Чориев ( 3 та) ҳамда Хусниддин Нишонов каби футболчилар термамиз тўпурарларидан бўлганди. 



Тарихга назар

Ўзбекистон Осиё Кубогида жами 15 маротаба иштирок этган. Ушбу мусобақа тарихидаги энг яхши натижамиз иккинчи ўрин ҳисобланади. Қизиғи, вакилларимиз турнир тарихида тўрт бора кумуш медал соҳибига айланган (2001, 2006, 2010, 2016).

Қайд этиш лозим, Ўзбекистон ҳозирча Осиё Кубоги финалида тўп тепган ягона Ўрта Осиё терма жамоаси ҳисобланади. 

Энди бироз рақибларга тўхталиб ўтамиз: 

Баҳрайн

Энг яхши натижа: 2018 йил. Чорак финал 
Умумий иштирок: 2 марта 
Сўнгги иштирок: 2018 йил 
Бош мураббий: Марселино Да Силва

Тақвим

Баҳрайн - Тожикистон. 27 сентябрь 
Туркманистон - Баҳрайн. 29 сентябрь 
Ўзбекистон - Баҳрайн . 1 октябрь 

Мазкур терма жамоа 10 йиллик танаффусдан сўнг 2018 йилги мусобақада ажойиб тарзда иштирок этди. Айни вақтда улар ўша даражани сақлаб қола олганми? Буни яқин кунлар ичида билиб оламиз. 



Тожикистон 

Энг яхши натижа: Чорак финал. 
Умумий иштирок: 10 марта 
Сўнгги иштирок: 2018 йил 
Бош мураббий: Воҳидов Паирав 

Тақвим: 

Баҳрайн - Тожикистон. 27 сентябрь  
Тожикистон - Ўзбекистон. 29 сентябрь 
Тожикистон - Туркманистон. 1 октябрь

Ўзбекистон билан саралашда бирга иштирок этган тожикистонликлар эндиликда Осиё Кубоги гуруҳ босқичида ҳам вакилларимизга рақиблик қилади. 



Туркманистон 

Энг яхши натижа: Гуруҳ босқичи (2005, 2006, 2007, 2008, 2010, 2012)
Умумий иштирок: 6 маротаба 
Сўнгги иштирок: 2012 йил 
Бош мураббий: Гуванч Канаев

Тақвим: 

Ўзбекистон - Туркманистон. 27 сентябрь 
Туркманистон - Баҳрайн. 29 сентябрь 
Тожикистон - Туркманистон. 1 октябрь

Туркманистон 10 йилдан сўнг ниҳоят яна Осиё Кубогига йўлланмани қўлга киритди. Уларнинг мақсади аввал қилмаган иши, аниқроғи, гуруҳдан чиқиш. Бироқ бу осон бўлмайди! 




                                                                                         Худайқулов Карим тайёрлади