Осиё Паралимпия қўмитаси президенти бошчилигидаги делегация Тошкент-2025'га кўрилаётган тайёргарликни ўрганади

Жорий йилнинг 5-8 октябрь кунлари Тошкент-2025 ёшлар Пара Осиё ўйинларига олиб борилаётган тайёргарлик билан батафсил танишиб чиқиш мақсадида Осиё Паралимпия қўмитаси президенти Мажид Рашид бошчилигидаги  расмий делегация  вакиллари  юртимизга ташриф буюради.

5 октябрь куни “Hilton” меҳмонхонасида Ёшлар Пара Осиё ўйинлари олди  кўрилаётган   умумий тайёргарлик ташкилий ишлар бўйича йиғилиш ўтказилади. Унда Тошкент-2025 дирекцияси ходимлари  қитъанинг мазкур нуфузли мусобақасига тайёргарлик юзасидан тақдимотни намойиш  этади.

Йиғилишда комплекс мусобақага олиб борилаётган катта ҳажмдаги ҳозирлик, Ўйинлар дастурига киритиладиган спорт турлари ва улар ўтказиладиган объектлар, делегацияларнинг таҳминий сони, транспорт-логистика масаласи, анти-допинг, виза, авиақатновлар ва шу каби ташкилий мавзулар ҳақида атрофлича маълумот берилади.

6 октябрь куни делегация аъзолари пойтахтимизда барпо этилаётган Паралимпия шаҳарчасида бўлиб, қурилиш ишларининг  бориши ва унинг бугунги ҳолатини ўрганади.

7 октябрь куни  соат 15:00 да  Спорт вазирлигида вазир Адхам Икрамов, Осиё Паралимпия қўмитаси президенти Мажид Рашид ҳамда Миллий паралимпия қўмитаси раҳбарияти иштирокида Тошкент-2025 ёшлар Пара Осиё ўйинларига бағишланган матбуот анжумани ташкил этилади.