Osiyoning eng yaxshi sport tashkiloti - O‘zbekiston milliy paralimpiya assotsiatsiyasi haqida nimalarni bilasiz?

O‘zbekiston milliy paralimpiya assotsiatsiyasi 2007 yilda tashkil etilgan. O‘tgan davr mobaynida tashkilot Xalqaro paralimpiya qo‘mitasi, xalqaro federatsiyalar hamda milliy paralimpiya qo‘mitalari bilan faol hamkorlikda imkoniyati cheklangan insonlar o‘rtasida sportni yanada rivojlantirishda ulkan ishlarni amalga oshirdi.

Milliy paralimpiya assotsiatsiyasi O‘zbekiston xududida imkoniyati cheklangan sportchilar o‘rtasida turli darajadagi musobaqalarni tashkillashtiradi va o‘tkazadi.  Paralimpiyachilarga respublika va xalqaro miqyosidagi musobaqalarga tayyorgarlik ko‘rishda to‘liq va sifatli sharoit yaratish tashkilotning muhim vazifalaridan biri hisoblanadi. Paralimpiya g‘oyalari hamda qadriyatlarini mamlakat va butun dunyo bo‘ylab targ‘ib qilish, davlat va jamiyat e’tiborini imkoniyati cheklangan insonlarga qaratish ham O‘zbekiston milliy paralimpiya assotsiatsiyasining asosiy vazifasidir.

O‘zbekistonlik paralimpiyachilarning ilk katta musobaqasi 2010 yil Xitoyning Guanjou shahrida o‘tkazilgan Para Osiyo o‘yinlari hisoblanadi. O‘shanda sportchilarimiz 1 ta oltin, 2ta kumush va 3ta bronza, jami 6ta medalni qo‘lga kiritishgan va umumjamoa hisobida 18-o‘rinni egallashgan.

So‘ngra paralimpiyachilarimiz 2014 yil Janubiy Koreyaning Incheon shahri mezbonlik qilgan navbatdagi Para Osiyo o‘yinlarida sezilardi o‘sishga erishishdi. Musobaqalarda 22ta oltin, 5ta kumush va 4ta bronza, jami 31ta medalga sazovor bo‘lgan sportchilarimiz umumjamoa hisobida 5-o‘rinni qayd etishdi. Ta’kidlash kerakki, ushbu Para Osiyo o‘yinlarida jami 44ta mamlakat sporchilari ishtirok etishgan edi.

Shuni alohida qayd etish lozimki, 2016 yil Braziliyaning Rio-de Janeyro shahrida o‘tkazilgan navbatdagi Paralimpiya o‘yinlari mamlakatimiz paralimpiya tarixida yangi sahifa ochdi desak aslo mubolag‘a bo‘lmaydi. Boisi, musobaqaga 32 nafar sportchi bilan tashrif buyurgan terma jamoamiz delegatsiyasi 8ta oltin, 6ta kumush va 17ta bronza, jami 31ta medalni qo‘lga kiritdi va umumjamoa hisobida 16-o‘rinni egalladi. E’tiborlisi, aynan Rio maydonlarida o‘zbekistonlik sportchilar ilk bor Paralimpiya o‘yinlarida oltin medallarga sazovor bo‘lishdi.

Yana bir e’tiborga moliy voqea 2018 yil Indoneziyada o‘tkazilgan Para Osiyo o‘yinlarida qayd etildi. Aniqrog‘i, terma jamoamiz bu safar o‘z tarixida eng ko‘p sportchilar delegatsiyasi bilan tashrif buyurdi. Ushbu Para Osiyo o‘yinlarida jami 53 nafar sportchimiz ishtirok etdi va rekord darajada – 75 ta medal qo‘lga kiritdi. Shularning 33tasi oltin, 24tasi kumush va 18tasi bronza medallaridir. Yakunda terma jamoamiz umumjamoa hisobida 6-o‘rindan joy oldi.

O‘zbekiston Paralimpiya assotsiatsiyasi 2014 yil Osiyoning eng yaxshi sport tashkiloti deb topilgan.

Sherzod Namozov (Dzyudo), O‘tkir Nigmatov (Dzyudo), Odiljon Turdialiev (Dzyudo), Xusnitdin Norbekov (Engil atletika), Aleksandr Svechnikov (Engil atletika), Nozimaxon Qayumova (Engil atletika), Firdavs Musabekov (Suzish) va Fotima Amilova (Suzish) kabi sportchilar milliy paralimpiyamizning dovrug‘ini jahonga yoyishda munosib hissa qo‘shishmoqda.