Отабек Ғуломхўжаев - "Пахтакор"га қарши "автобус" қўйилгани, плей-офф қачон бўлиши ва "Нефтчи"ни ўрганишни бошлагани ҳақида гапирди

“Андижон” клуби Суперлигада 13-ўринни эгаллаб плей-оффда иштирок этадиган бўлди. Кеча “Пахтакор”га қарши учрашувда мағлубиятга учради. Лекин “Бухоро” ҳам ютқазгани сабабли андижонликларда имконият сақланиб қолди. Плей-оффда эса про-лиганинг иккинчи ўрин эгаси билан беллашиши олдиндан маълум. Бу эса “Нефтчи”. Тўғри, “Турон”га қарши баҳсдан кейинги тартибсизликлар сабабли кўпчиликда ҳар хил гаплар юрибди. Аммо ҳали ЎФА ҳамда ПФЛ бу борада қарор чиқаргани йўқ, тез орада барчаси маълум бўлади. Лекин айни пайтдаги ҳолатга қарасак, иккинчи ўринда “Нефтчи” турибди. “Андижон” бош мураббийи Отабек Ғуломхўжаев “Пахтакор”га қарши беллашувдан сўнг, ўша ўйиндаги мағлубият, Кубок ва плей-офф ҳақида ўз фикрларини билдирди.

“Пахтакор” билан ўйиндан аввал плей-офф ҳақида ўйлаганмиди?

-  “Қўқон-1912”га қарши ўйиндан кейин ҳам плей-офф ҳақида ўйламаётганим ҳақида айтганман. Негаки, ҳеч бир мураббий жамоасини майдонга ютқазиш учун олиб чиқмайди. Кучли рақиб билан баҳсда ҳимояда тартибли ўйин кўрсатиб, қарши ҳужумлардан пайт пойлашга ҳаракат қилади. “Пахтакор”га қарши ўйинда иккита голни 32 ва 33-дақиқаларда ўтказдик. Унгача ҳимояда “автобус”ни қўйиб қўйгандик. Фақат ўзимизнинг оддий хатолар эвазига голлар ўтказдик. Ўзимизда ҳам гол урадиган имкониятлар бўлди. Энди плей-оффга тўғри келдик. Кечаги учрашувнинг охирларида ёрдамчим ёнимга келиб, “Бухоро” ҳам, “Сурхон” ҳам ютқазаётганида айтганидан кейин жуда алам қилди. Агар “Пахтакор”ни ютганимизда бемалол Суперлигада қолардик. Ҳали ҳам Худо бизга имконият бериб турибди.

Кубок ҳақида

-  Олдимизда Ўзбекистон Кубоги баҳслари турибди. Мана шу ўйинлар орқали плей-оффга тайёрланамиз. Дарҳол айтаман: бизга Кубок кераксиз эмас, керак. Барибир Андижон шаъни турибди. Ҳар қандай ҳолатда ҳам муносиб ўйнаймиз. Рақиб “Насаф” бўлса ҳам ҳурмат қилган ҳолда ғалаба учун курашамиз. “Пахтакор” билан ўйин тугаши биланоқ “Насаф”га қарши тайёргарлик бошланган. Гарчи плей-оффда иштирок этишимизни билсак-да, олдимизда турган ўйин – “Насаф” билан учрашув.

“Нефтчи”га қарши водий дербиси тўғрисида

-  Дербилар ҳар доим ҳиссиётларга бой ўтади. Лекин биз билан ўйинда “Турон”га қарши учрашувда юз берган тартибсизлик бўлмайди. “Нефтчи” ҳам, “Андижон” ҳам фақат ғалабани кўзлаб тушади. Мухлислар эса ўз жамоаларини олқишлашади. Олдинги нохуш ўйиндан эса ҳамма ўзига хулоса чиқарган деб ўйлайман. Аммо доим водий клублари ўртасидаги тўқнашувлар ҳақиқий жангга айланади. Бироқ мухлислик маданиятини унутмаслик лозим. Йигитларимиз майдонда бор кучларини ташлашади. Ўйлайманки, яхши ўйин бўлади. Мана, энди “Нефтчи”ни кузатишни бошлаймиз. Тўғриси, бунгача кузатмагандик, маълумотларимиз ҳам кам эди. Мана, энди рақибни ўрганишга киришяпмиз.

Плей-офф қачон бўлиши мумкин?

-  Плей-офф қачон бўлади? Менимча, ҳаммаси “Насаф” билан ўйинимиздан кейин маълум бўлади. Ўзбекистон Кубогида қанча кўп узоққа борсак, плей-офф билан беллашувнинг муддати шунча чўзилиши мумкин. Агар Кубокда тўхтасак, кейин шунинг орасида бизга бирор санани белгилаб ўйин қўйиб беришса керак. Водий дербисини водийдан ташқарида ўтказилиши ҳам эҳтимолдан ҳоли эмас. Ҳар қалай шундай ўйлаяпман. “Нефтчи” – “Турон” ўйинидан сўнг, бу сафарги учрашувни бошқа бетараф майдонда ўтказилиши ҳам мумкин. ЎФА билан ПФЛнинг ҳар қандай қарорини қўллаб-қувватлаймиз. Қаерда бўлса ҳам ўйнаймиз.