Отабек Ғуломхўжаев: Йигитларимиз Саудия Арабистонини гуруҳда қолдириб кетишни мақсад қилишяпти

Айни пайтда Саудия Арабистонида U-19 Осиё чемпионати учун саралаш босқичи мусобақаси ўтказилмоқда. Отабек Ғуломхўжаев бошчилик қилаётган терма жамоамиз эса дастлабки иккита учрашувда ғалаба қозонди ва энди учинчи турда мезбон – Саудия Арабистонига қарши майдонга тушади. Осиё чемпионатининг финал босқичи келаси йили Ўзбекистонда ўтказилиши сабабли вакилларимизнинг ушбу саралаш баҳсларида қайд этадиган натижалари ҳеч қандай аҳамият касб этмайди. Шунга қарамай, терма жамоамиз учинчи турда ҳам ғалаба қозонишни ўз олдига асосий вазифа қилиб қўйган. Ҳозирда Саудия Арабистонида бўлиб турган терма жамоамиз эртанги баҳсга жиддий тайёргарлик кўрмоқда. Биз эса учрашув олдидан терма жамоамиз бош мураббийи Отабек Ғуломхўжаев билан боғландик ва дастлабки иккита ўйин ҳамда бўлажак баҳс ҳақида гаплашдик.

- Ёшлар терма жамоамизнинг дастлабки иккита ўйиндаги ишончли ғалабаси билан табриклайман. Аввало ортда қолган иккита учрашув ҳақида тўхталиб ўтсангиз?

- Биринчи ўйинда Ҳиндистон билан ўйнадик. Албатта, биз бўлажак рақибни етарлича ўрганиб чиққандик. Лекин бу мен ва шогирдларимнинг 50-60 фоизи учун ҳам биринчи расмий ўйин эди. Бунгача бир неча бор четда ўйнаган бўлсак-да, барчаси ўртоқлик мақомидаги баҳслар бўлганди. Барибир расмий беллашувда ватан номидан ўйнаётганингизда ўзига яраша ҳаяжон бўлади. Умуман олганда, биринчи учрашувимиз учун таассуротларимиз ёмон эмас. Йигитларимиз барча кўрсатмаларимизни аъло даражада бажаришди. Осиё чемпионати Ўзбекистонда ўтади дегани, бу йигитлар хоҳлаганча ўйнашади дегани эмас. Албатта, терма жамоамиздан натижа талаб қилинаётганди. Биринчидан раҳбарият томонидан, иккинчидан эса ўзим томонимдан ҳам натижа кўрсатишимиз муҳимлиги айтиб келинаётганди. Футболчиларимизда ортиқча босим йўқ эди. Фақат йигитларимиздан масъулиятни янада кўпроқ тушунишлари талаб қилинди. Ўйин бўйича гапирсам, Ҳиндистон биринчи бўлимда ҳимояга ҳаддан ортиқ кўп эътибор қаратди. Йигитларимиздан талаб қилингани эса гол уриб олганимиздан кейин «очилиб» кетиш эди. Ҳисоб 2:0 бўлганидан кейин кўплаб голли имкониятлардан фойдалана олмадик. Афғонлар билан учрашувда ҳам шунақа бўлди. Иккинчи бўлимда адашмасам, етти марта 100 фоизлик вазиятлардан фойдалана олмадик. Албатта, бу омад билан боғлиқ. Балки бу бир томондан Саудия Арабистонига қарши баҳсдан аввал яхшиликка бўлгандир. Саудияликлар Ҳиндистон дарвозасига тўртта гол уришди. Тўплар нисбати борасида бизда плюс тўрт бўлса, уларда плюс бешни ташкил қиляпти. Мана шу голлар ҳисоби бўйича саудияликлар ҳозирча гуруҳда биринчи ўринда туришибди. Лекин бу ҳеч нимадан далолат бермайди. Шунингдек, биз дастлабки иккита учрашувда асосий таркиб футболчиларимизни тушириб, алмаштириб ўйнатдик. Орада пала-партишликка ҳам йўл қўйдик. Қолаверса, ҳимоядан ҳам ўйнаган пайтларимиз бўлди.

ғуломхўжаев3

- Албатта, 3-турда Саудияга қарши ўйин марказий тўқнашув саналади. Мазкур ўйинга тайёргарлик қандай олиб борилмоқда?

- Иккинчи ўйиндан кейин тикланиш машқларини бажардик. Бугун ҳам асосий урғуни яна шунга ўхшаш машқларга қаратамиз ва йигитларимизнинг тонусини жойига келтириб оляпмиз. Қисман тактикага ҳам эътибор бердик. Шунингдек, назарий машқларда ҳам кўпроқ Саудиянинг кучли ва кучсиз томонларини йигитларимизга тушунтириб ўтяпмиз. Саудияга қарши учрашувнинг аҳамияти катта. Мезбонлар фақат ғалаба учун ўйнашади. Улар ўз юртида ўйнашяпти ва ютишни исташади. Камида дуранг учун тўп суришади. Агар бизга ютқазса,  6 очко билан гуруҳда 2-ўрин билан қолиб кетишларининг ҳам эҳтимоли катта. Худо хоҳласа, биз 1-ўринни олиб, улар 2-поғонани олишса, бошқа гуруҳлардаги 2-ўриндаги термаларга қарасак, уларнинг тўплар нисбати 10 та ва ҳатто 20 та фарқни ташкил қиляпти. Бундан ташқари, 2-ўриндаги термаларнинг очколари 6 эмас, 7 та бўлишлари ҳам мумкин. Ўйлашимча, Саудия бундай ҳолатларни ҳам назорат қилишяпти. Улар аввало ғалаба учун курашишади, аммо дуранг учун ҳам рози бўлишади. Чунки агар дуранг бўлишса, улар барибир гуруҳда битта тўп фарқи эвазига 1-ўринни олишади. Кеча биз ҳам ҳаммасини ҳисоблаб ўтирганмиз. Лекин биз ҳам максимал даражада бор кучимизни кўрсатишга ҳаракат қиламиз. Табиийки, майдонга ғалаба учун тушамиз. Бунга эса ўзига яраша сабаблар ҳам бор. Бундан икки йил олдин Дилшод ака Нуралиев бошчилигидаги ўсмирлар терма жамоамиз сафида ҳозирги жамоамиздан 40-50 фоиз футболчи ўша пайтда ҳам бўлишган. Ўшанда терма жамоамиз Саудиядан аламли тарзда қайтиб кетишганди. Бу эса йигитларимизнинг хаёлларида турибди. Ўйинчиларимизнинг ўзлари ҳам Саудия Арабистонига яримта ҳам имконият қолдирмасдан максимал даражада тўп суришга ҳаракат қилишларни айтишяпти. Улар Саудияни 6 очкоси билан гуруҳда қолдириб юборишни мақсад қилишяпти. Жамоамизда ҳеч қанақа босим йўқ. Футболчилар масъулиятни тўлиқ ҳис қилиб, ватан шаъни учун ўйнашга тайёр. Насиб қилса, гуруҳдаги охирги учрашувда ҳам энг яхши ўйинларимиздан бирини кўрсатишга ҳаракат қиламиз. Битта ҳавотирга соладигани шуки, балки бу мураббий сифатида айтадиган гапим кулгули туюлиши мумкин, аммо ҳакамлар ўйинни бузиб қўйишмаса бўлди. Негаки, саудияликларнинг Афғонистонга қарши учрашувида ҳакамларнинг хатолари яққол кўринди. Ўша ўйинда афғонлар муносиб курашишди. Мезбонлар эса қийналиб зўрға 1:0 ҳисобида ютишди. Ўйин тақдирини пенальтидан урилган гол ҳал қилди. Биласизми, ўша вазиятда умуман пенальти йўқ эди. Хуллас, афғонлар билан учрашувда ҳакам Саудиянинг «қулоғидан» тортиб кетди. Ўйиннинг бориши ва сифатини ҳакам бузиб қўйиб, йигитларимизнинг кайфиятини тушириб қўймаса, биз ўйинга тайёрмиз ва араблардан қўрқадиган жойимиз йўқ.

- 14 ноябрь куни ЖЧ-2022 саралаш босқичи доирасида Тошкентда Ўзбекистон миллий терма жамоамиз Саудия Арабистонини қабул қилади. Эртага эса ушбу термаларнинг ёшлар жамоалари ўзаро куч синашишади. 14 ноябрь куни бўладиган муҳим баҳс олдидан эртага ўтказиладиган учрашувнинг қандай аҳамияти бор деб ўйлайсиз? Яъни, иккала беллашувнинг бир-бирига боғлиқлик томонлари борми?

- Бу вазиятда ҳеч қанақа боғлиқлик жойи йўқ. Ўз уйимизда Осиё чемпионати финал босқичи ўтказилиши боис биз мезбонмиз. Биз фақат ватан шаъни, йигитлар ўз ғурури учун ўйнашади. Мақсад битта – ғалаба қозониш.  Миллий терма жамоамиз олдида эса учинчи босқичга чиқиш вазифаси турибди. Бизнинг ўйинимиз билан боғлиқ томонини кўрмаяпман. Балки эртага биз ғалаба қозонсак, бу ҳолат миллий терма жамоамизга янада қўшимча далда бўлиши мумкин. Аммо ўйлайманки, бу учрашувга қараганда, Тошкентда бўладиган ўйиннинг аҳамияти муҳимроқ. Фурсатдан фойдаланган ҳолда миллий терма жамоамизга омад тилаб қоламан.

ғуломхўжаев2

- Таркибдаги ҳамма ўйинчилар соғ-саломатми? Сизни қийнаётган муаммо йўқми?

- Таркиб борасида ҳеч қандай муаммоларга дуч келмадик. Ҳаммаси жойида. Фақатгина кичик жароҳатлар бор. Эртанги ўйингача улар ҳам тўлиқ тикланиб олишади.

- Мусобақа ташкилотчилиги ва Саудиянинг эътибори қандай бўляпти?

- Нолисак ношукрчилик бўлади. Ўз вақтида Темур Олимхўжаевга ёрдамчи мураббий бўлиб юрган пайтимда ҳам Осиё чемпионатини кўргандим. Барибир бундай мусобақаларда савия юқорироқ бўлади. Албатта, иш бор жойда хато ва камчиликлар учраб туради. Саудияда айрим пайтларда кичик асаббузарликларга йўл қўйишлари мумкин. Масалан, 5 километрлик жойга 20 километрлик йўл билан бошқа томондан айлантириб олиб боришади. Ўтган куни машғулотга борсак, стадион ёпиқ экан. Орадан 10-15 дақиқа ўтганидан кейингина стадионни очиб беришди. Хуллас, ташкилотчилик томонидан кичик бўлса-да, асабга тегадиган ҳолатлар учраб турибди. Лекин биз бундай ҳолатларга, уларнинг руҳий «ҳужуми»га эътибор ҳам қилмаяпмиз. Асабимизни бузмасдан ўз мақсадимиз йўлида ишлашда давом этяпмиз. Лекин меҳмонхона, овқатланиш ва бошқа томонлама ҳаммаси юқори даражада. Кайфиятимиз эса доим юқори. Уларга эса агар сизлар Осиё чемпионатига чиқсанглар, бизнинг қандай шароит ва имкониятлар яратишимизни, қўлимиз кўксимизда бўлади ва меҳмондўст эканлигимизни кўрасизлар дедим. Лекин улар ҳали Осиё чемпионати финал босқичига чиқишгани йўқ.

 

Минбар

Барча блоглар