Отабек Шукуров ва Азиз Ғаниев БАА устидан ғалаба қозонган футболчиларимиз билан учрашди

Аввал хабар берганимиздек, бугун Сервер Жепаров бошчилигидаги Ўзбекистон U15 терма жамоаси Бирлашган Араб Амирликлари U15 терма жамоасига қарши ўртоқлик ўйини ўтказди ва 2:1 ҳисобида ғалаба қозонди.

Ўзбекистон футбол ассоциацияси матбуот хизматининг хабар беришича, БАА чемпионатида тўп сураётган ўзбекистонлик футболчилар – Отабек Шукуров ва Азизбек Ғаниев ўсмирлар терма жамоамизнинг бугунги ўйинига ташриф буюришди. Учрашувдан сўнг тажрибали футболчиларимиз ёш футболчиларимиз билан суҳбатлашиб, уларни ғалаба билан қутлашди.

Шунингдек, уларга ҳозирдан бор эътиборларини ўз устиларида ишлашга қаратишлари кераклиги, машғулотларда тиришқоқлик ва шижоат билан ҳаракат қилишлари лозимлигини айтишди. Маҳоратли футболчиларимиз ёш укаларига ҳозир келажак учун мустаҳкам пойдевор қуриб оладиган пайт эканлигини таъкидлаб, уларга ўз маслаҳат ва тавсияларини берди.