Ўткир Юсупов: "Менинг ўрнимда сизнинг ота-онангизни ҳақорат қилишса, нима қилган бўлардингиз?"

Суперлига 7-тур учрашувлари доирасидан ўрин олган “Сўғдиёна” – “Навбаҳор” учрашуви якунига етганидан сўнг, “Навбаҳор лочинлари” футбол клуби ўйинчилари – Ўткир Юсупов ҳамда Аброр Исмоилов рақиб жамоа мухлисларига қарата номақбул хатти-ҳаракатларни амалга оширган. 

Лига комиссарининг билдиргиси асосида уларнинг иши ЎФА Тартиб-интизом қўмитасига оширилади. 

Ўзбекистон Профессионал футбол лигаси барча футболчилар, мураббийлар, шунингдек жамоалар расмийларини профессионал бўлишга чақиради. Лига байроғи остида ўтказиладиган учрашувлар давомида этика ҳамда ўзини тутиш қоидаларидан четга чиққан ҳар қандай расмий шахс тегишли тартибда жазоланади.

Нега Ўткир Юсупов ўйиндан сўнг, жиззахлик ишқибозларнинг асабига тегди? Вазият аслида қандай бўлган эди? Sports.uz  портали барчасини аниқлаштириш мақсадида, "лочинлар" посбони билан боғланди. 

Ўзи барчаси чигалёзди машғулотларидан бошланди. "BallBoy"лар бошлаб берди. Ҳисобда олдинга чиқиб олганимиздан сўнг, ишқибозлар бизни вақт чўзишда айблай бошлади. Аввалига ўзимни, кейин ота-онамни ҳам ҳақорат қилишни бошлашди. Шу ўринда, "Суғдиёна"ни ўша кунги стадиондаги мухлисларига бир нарса айтмоқчи эдим. Барчамиз ҳам одаммиз. Сизларнинг ҳам ота-онангиз бор. Менинг ўрнимда сизнинг ота-онангизни ҳақорат қилишса, сиз нима қилган бўлар эдингиз? Ютқазишни ҳам билиш керак. Агар айб менда бўлганида, узр сўраган бўлар эдим.

Ота-онамни ҳақорат қилган инсонлардан узр сўрамоқчи эмасман! Мени вақт чўзганликда айблашди, аммо "Суғдиёна"нинг бир тур аввал "Андижон"даги ўйинига нега бундай реакция билдиришмади? Нега, Тартиб-интизом қўмитаси ўша ўйинни кўриб чиққани йўқ? Митрович Андижонда илк дақиқалардан вақтни чўзишни бошлади. Ҳакамлар илк дақиқаларданоқ вақт чўзмаслик керак эканлигини уқтиради. "Навбаҳор"нинг ҳар бир ҳаракати доим назоратда, аммо бу ўлчов барчага бирдек эмас! Мен, футбол ишқибозларининг барчасини ҳурмат қиламан. Уларга ҳеч қандай адоватим йўқ. Ўйиндан кейин, номаъқул ҳаракат қилганликда айбландим. Ваҳоланки, мен қўл билан ҳеч қандай уятсиз ишора қилмадим. Трибунадаги мухлисларга агрессия ҳам намойиш этмадим. Ғалабани нишонлаб, уларнинг ҳақоратига реакция билдирдим холос", - деди Юсупов.

Айнан шу масала бўйича, Жиззах клуби вакили билан бўлган суҳбатдан парча:

"Ўткир, ишқибозларга қарата номаъқул қилиқ қилди, аммо ҳеч кимни ҳақорат қилгани йўқ. Ҳа, ишқибозлар қизишиб кетишди, аммо футболчи доим эмоцияларини жиловлай олиши лозим. Мухлис, стадионда ўз жамоаси ғалабаси учун барча нарсага тайёр бўлиши табиий. Улар билан тенг бўлишга хожат йўқ. Профессионал футболчи бундай қилмаслиги керак. Майли, бўлар иш бўлди."

Суперлига ўсгани сари, босим ва ундаги интригалар ортиб бориши табиий. Буни нормал қабул қилишни ўрганиш лозим. Ўша куни, Ўткир жамоаси ғалаба қозониш учун қўлидан келган ҳамма ишни қилган бўлса, жиззахлик мухлислар ҳам жамоасига ёрдан бериш учун трибунадан туриб, рақибга таъсир кўрсатишга уринди. Агар, барчамиз профессионал бўлишга ҳаракат қилмасак, бундай муаммолар кўзга ташланаверади.