Овора бўлманг, мен “Реал”дан кетмайман!

Европа матбуотида “Реал” клуби президенти Флорентино Перес келаси йили раҳбарлик лавозимини топшириши ҳақида маълумотлар чиқа бошлади.

Тажрибали функционер бу хабарларга дарров муносабат билдирди.

COPE нашрининг таъкидлашича, “Қироллик клуби” хўжайини президентлик ваколати тугамагунича, яъни 2029 йилнинг охиригача ўз ишини давом эттиришини таъкидлаган. Бу муддат ичида Перес ўзи режалаштирган лойиҳаларни амалга оширишга ҳаракат қилади.

Жумладан, клуб раҳбари 2029 йилга қадар “Сантьяго Бернабеу” стадионини тўлиқ реконструкция қилишни мўлжаллаган.

Испаниялик тадбиркор илгари 2000-2006 йиллар давомида “Реал” президенти лавозимида ишлаган. 2009 йили яна ўз курсисини қайтариб олди ва шундан бери “Қироллик клуби”ни маҳорат билан бошқариб келяпти.

Перес бошқарув даврида “Реал” футболчилари умумий ҳисобда 37 та совринга эга чиққан. Шулардан еттитаси Европа Чемпионлар лигасининг бош совринидир.