Ўз вақтида "Зальцбург" 100 минг еврогача сотиб олишга тайёр эди. Дания ва Украина грандларининг таклифини нега қабул қилмади? Акром Комилов билан суҳбат

АГМК клуби янги мавсум учун қўлга киритган янги футболчилари орасида Акром Комилов ҳам бор. “Пахтакор”да тўп сурган ҳимоячининг олмалиқликлар сафига кўчиб ўтиши шубҳасиз Миржалол Қосимов жамоасининг ўйинини, айниқса, ҳимоя чизиғини кучайтиришига хизмат қилади. Комилов борасида бир қатор қизиқарли маълумотлар йўқ эмасди. Бу борада футболчи sports.uz мухбирининг саволларига жавоб қайтарди.

- Акром, АГМКнинг “Навбаҳор” устидан қозонган ғалабаси билан табриклайман. Ўйинни кўрдик, жуда қизиқарли кечди. Бундай юқори даражадаги учрашувдан кейин нималарни айта оласиз?

- Ўйиннинг қийин ўтишини билиб тургандик. Чунки “Навбаҳор” ўз уйида ҳам, сафарда ҳам яхши ҳаракат қилиши маълум эди. Улар янги мавсумга жиддий тайёрланишган. Биз учта учрашувда тўрт очко жамғаргандик. Керакли очколарни йўқотгандик. Бу баҳсда ютишимиз зарур эди. Қўшимчасига бизни олдинда Қатарда Осиё Чемпионлар лигаси плей-оффида муҳим учрашув кутаётганди. Қатарга кетиш олдидан ғалаба қозониб кайфиятни кўтариб олмоқчи эдик. Мураббийларимиз “Навбаҳор”нинг кучли ва кучсиз томонларини кўрсатиб беришди, шунга қараб тайёргарлик кўрдик. Ўйинда йигитларнинг иштиёқи кучли эди. Уч очко жамоамиз учун ўта муҳим ҳисобланарди. Шунга яраша ғалаба қозондик ва сафарга юқори кайфиятда йўл оламиз.

- Тўғри, АГМКни энди Қатарда “Ал-Гарафа”га қарши ўта мураккаб баҳс кутяпти. Бўлажак рақибни қанчалик ўргандинглар? Ўйин олдидан нима деган бўлардингиз?

- Очиғини айтсам, ҳали “Ал-Гарафа”ни ўрганиб чиққанимиз йўқ. Чунки ички чемпионатимизда тур ўйинлари ва терма жамоа учрашувлари борлиги сабабли, ҳали бунга вақтимиз бўлмади. Олдимизда Суперлигадаги ўйинлар бўла туриб, уларни бир четга суриб қўйиб, Қатардаги рақибимизни ўргана олмасдик. Мана, энди “Ал-Гарафа”ни кузатишни бошлаймиз. Бунгача биз чемпионатимизда тўртта кучли жамоа билан ўйнадик. “Локомотив”, “Насаф”, “Пахтакор” ва “Навбаҳор”. Энди бутун эътиборимизни Қатардаги ўйинга қаратамиз. Мураббийларимиз бўлажак рақиб ҳақидаги маълумотларни бизга кўрсатишади.

- Фаолиятингиз давомида илгари бир неча бор чемпионлар лигасида ўйнагансиз ва Қатар клубларига қарши ҳам тўп сургансиз. Уларнинг орасида сиз учун ёқимли ва ёқимсиз ўйинлар бўлганми? “Ал-Гарафа”ни қанчалик биласиз?

- Ёқимли ёки ёқимсиз, деб айта олмайман. Қатар жамоалари билан учрашувларда кўпинча ё ютганмиз, ё дуранг бўлган. Мағлубиятлар камроқ эди. Лекин айнан “Ал-Гарафа” билан ҳали ўйнамаганмиз. “Ал-Садд”, “Ал-Жаиш”, “Ал-Дуҳайл” каби клубларига қарши тўп сурганмиз. Қатарнинг жамоалари билан бемалол ўйнаса бўлади. Ҳаммаси Худодан, агар ўз ўйинимизни кўрсатадиган бўлсак, кейинги босқичга чиқишимиз мумкин. Имкониятларни 50х50 баҳолайман. Ғалаба учун қайси клубда хоҳиш кўпроқ бўлса, ўша жамоа ютади.

- АГМКга “Пахтакор”дан кўчиб ўтдингиз. Тўғриси, чемпион жамоа сафини тарк этишингизни кутмаганлар кўп эди. Бундай қарорга келишингизнинг асосий сабаби нимада?

- Деярли уч йил олдин “Бунёдкор”дан яхши спорт формасида “Пахтакор” жамоасига ўтдим. Лекин у ерда мени кўпроқ жароҳатлар безовта қилди. Оғир жароҳатни бошимдан ўтказдим. Деярли бир ярим йил футболсиз юрдим. Қийинчиликлар кўп бўлди, спорт формага кириб олишим ҳам оғир кечди. “Пахтакор” жамоасига раҳмат, улар жароҳатланган пайтимда мени ёлғизлатиб қўймади. Қўлдан келганича менга ёрдам беришди. Клубда ўйин амалиётимни йўқотиб қўйганим учун АГМКга ўтдим. Миржалол ака Қосимов қўнғироқ қилиб, жамоасини муҳим ўйинлари борлиги, вазифа жиддийлиги ва сен анча пайт ўйнамадинг, бу ерда ўйин амалиётига эга бўлиб, ўзингни кўрсатиш имкониятига эга бўласан, деди ва мен АГМКга ўтдим. Миржалол Қосимовни яхши биламан, ўз ишининг устаси. Менинг ўйин амалиётига эга бўлишимни улар ҳам яхши тушуниб туришганди. АГМКга ўтганим орқага чекиниш эмас. Ахир Олмалиқ жамоаси яхши шаклланган, чемпионатнинг етакчиларидан бири саналади. Миржалол Қўшоқович бу йил АГМКни янада сезиларли даражада кучайтирди.

- “Бунёдкор”дан “Пахтакор”га йўл олганингизда шундай фикрга бордик: Комилов “Пахтакор” орқали Европага кетмоқчи! Аммо ўзингиз айтганингиздек, жароҳатлар сизга халақит қилди ва бу режаларингизни ўзгартириб юбордими?

- Сизга ростини айтаман, “Пахтакор”га ўтишимдан аввал менга Европа Чемпионлар лигасида ўйнайдиган клублар томонидан таклифлар бўлган. Ҳаттоки, ўз сафига қўшиб олишга тайёр жамоа ҳам бор эди. Мен бундай таклифлар тўғрисида ота-онам билан яхшилаб маслаҳатлашдим. Якунда “Пахтакор”ни танлашга қарор қилдим. Олдимда Европанинг яхши клубларидан вариантлар бисёр эди.

- Айнан қайси клублар сизга жиддий қизиқиш билдирганди?

- Менга маълум бўлишича, “Ливерпул”га қарши ўйнаган Даниянинг “Митьюлланд”, Киевнинг “Динамо”си ва яна бошқа клублар. Булардан ташқари, Корея жамоаларидан ҳам аниқ таклифлар бўлди. Фақат уйдагилар билан келишиб, ўзимизда қолдим. Аммо бу чекиниш эмас. Яна ўз спорт формамга қайтиб Европага кетиш ва терма жамоага қайтиш ниятим бор. “Пахтакор”да жароҳатларга учраганим албатта режаларимни ўзгартириб юборди. Бошида борганимда деярли асосий таркибда ўйнаётгандим. Дубайдаги йиғинда ҳам яхши қатнашдим, аммо ўша ерда жароҳатга учрадим. Икки-уч ой даволаниб, спорт формамга қайтган пайтимда яна жароҳат олдим ва бу сафаргиси жиддийроқ бўлди.

- Европадан тушган таклифлардан бирини қабул қилмаганингиздан кейин афсусландингизми?

- Албатта, кейинчалик бундай ўй-хаёллар бўлади. У ерларда ризқим бўлмаган экан, балки ундан ҳам яхшироқ клубга кетарман. Худо билади.

- Адашмасам, ёшлик чоғингизда Европада қайсидир клубнниг машғулотларида ҳам қатнашиб қайтгандингиз-а?

- “Бунёдкор”да ўйнаб юрганимда ўсмирлик чоғимда Австрияга борганман. 2012 йили БААда ўсмирлар ўртасида жаҳон чемпионатида қатнашганмиз. Ўша мусобақадан сўнг, Австрияга Ред Булл жамоасига борганман. У ерда 10 кун кўрикда иштирок этганман. Ўшанда 17-18 ёшда эдим. Мени ёшлар жамоасида синаб кўришган. Ўша пайтда “Бавария”нинг ёшлари билан ўртоқлик ўйинида майдонга тушишимиз керак эди. Клуб спорт директори “Ред Булл Зальцбург”нинг ёшлар жамоаси мураббийидан бу ўйинчини қанча вақтга майдонга туширасан деб сўраганида, 25-30 дақиқа давомида синаб кўраман деганди. Бундай қисқа вақт ичида футболчининг нимасини кўрасан, ўзини кўрсатишга улгурмайди-ку, дея жавоб қайтарган, аммо мураббий шунча вақт имконият беришини айтган. “Зальцбург”ни U-21 жамоаси ҳам бор. Чехияда иккита ўртоқлик учрашуви режалаштирилган. U-21 жамоаси мураббийига мени синаб кўришларини айтишган. Мураббий менга имконият берган, ўзимни кўрсатганман. Ўшанда мураббий илиқ фикрлар билдириб, сени олиб қоламиз деган. Австрияга қайтганимиздан кейин яна спорт директори билан гаплашганман ва менга ҳаттоки 4-рақамни ҳам беришган. Бир йил ўринбосарлар таркибида ўйнайсан, кейин аста-секин асосий таркибга ўтказамиз дея менга ишонч билдиришган. Клубинг билан гаплашамиз, келишсак сени албатта оламиз дейишган. У пайтда ёш эдим. Эсимда, “Зальцбург” клубидагилар менга, сени кўпи билан 100 минг еврогача сотиб олишимиз мумкин деган. Уларга кераклигим учун мени сотиб олишини айтишган. Тошкентга қайтганман ва бир ҳафтадан кейин нимадир бўлди-ю, Австрия варианти бекор бўлганини билганман. Ёш бўлганим учун бунинг сабабини сўрагани қўрққанман.

- Ўша пайтда “Зальцбург”да ҳозирги пайтдаги қайси таниқли футболчилар бор эди?

- Садио Мане бор эди. Яна кўплаб яхши ўйинчилари тўп сурарди. “Зальцбург” чемпионлар лигасида ўйнайдиган жамоа эди. Шунинг учун таркиби кучли эди. Мане кейинчалик “Саутгемптон”га кетган. У ерда ёшлар жамоаси билан асосий таркибнинг машғулотлари алоҳида бўларди. Лекин битта жойда шуғулланардик.

- Биз ҳам Европа майдонларида ўзбекистонлик футболчилар кўпайишини жуда истаймиз...

- Ишонинг, ўзбек футболчилари 22 ёшгача Европа савияси даражасида бўлишади. Бизни арзон нархга бўлса ҳам Европа клубларига сотишса, бу терма жамоа манфаати учун фойда, бундай ҳолатда клуб манфаати устун бўлмаслиги керак. Арзон нархга сотишса ва у ерда футболчи ўзини кўрсатса, ўзбек ўйинчиларига талаб ортишни бошлайди. Шу сабабли ўйинчини вақтида хорижга кетишига имконият бериш керак. Нимага бошқа терма жамоалар ўсяпти? Уларнинг кўплаб ўйинчилари Европада ўйнашяпти. Эсимда, “Зальцбург”га борган пайтимда қатарлик иккита ўйинчи бор эди. Улардан сизлар қандай келгансизлар деб сўраганман. Қатарда “Aspire” академияси бор. Унинг тарбияланувчиларини текинга Европа клубларига жўнатишади. Мақсад, ўша ёшларни ривожлантириш. Масалан, ўзимиздаги ёш ўйинчиларга қарасак, 1995-96 йиллардаги футболчиларни олайлик, биз иккита жаҳон чемпионати ва тўртта Осиё чемпионатини кўрдик. Иккала мусобақада ҳам яхши қатнашганмиз. Кучли рақиблар билан тенгма-тенг ўйнаганмиз. Мисол учун жаҳон чемпионатига чиқиш керак дейишади, аммо бу қийин иш. Айтайлик, Эрон, Япония, Жанубий Кореянинг кўплаб футболчилари Европанинг кучли чемпионатларида тўп суришади. Биздаги бир-иккита Европада тўп сураётган ўйинчиларимиз ҳисобига улар билан тенглаша олмаймиз. Ҳаракат қиламиз-у, аммо вазиятга ҳам реал қараш керак. Европада катта даражадаги ўйинларда ўйнаб юрган футболчилар билан Ўзбекистон чемпионати ёки Осиё клубларида ўйнаётган ўйинчиларни солиштириш керак эмас. Бизда ҳам 10 дан ортиқ футболчиларимиз Европанинг кучли чемпионатларида ўйнаб юриб терма жамоага келишса, ана шунда жаҳон чемпионатини талаб қилиш керак. Буни мухлисларимиз ҳам тўғри тушунишларини истардим. Европада ўйнаётган футболчиларимиз кам, аксарияти Осиёда ва ўзимизнинг чемпионатдан. Бундай паллада юқори савияда тўп суриш осон эмас. Негадир ҳозирги ёшларимиз орасида кўзга ташланаётганлари кам. Биздан кейинги авлод вакиллари Осиё чемпионати гуруҳ босқичи, ҳаттоки саралашидан ҳам ўта олишмаяпти. Чунки ҳозиргилар алоҳида-алоҳида бўлиб юришади. Ҳар ким кўрпани ўзига тортишади. Бизнинг тенгқурлар орасида бундай бўлмаган, ҳаммаси жамоавий эди. Шунинг учун иккита Осиё чемпионатини ютдик, икки марта жаҳон чемпионатига чиқдик.