Ўз юртида иш тополмаган юлдузни испан клублари чақирди

Ўз даврида Англия футболининг энг ёрқин юлдузларидан бўлган Деле Алли янги иш қидиряпти. У Англия Премьер-лигаси клубларига ўз хизматини таклиф қилиб, ўзига жамоа топа олмади.

Аввал “Тоттенхэм”, “Эвертон” ва “Комо” клубларида ўйнаган Деле Алли энди фаолиятини Испанияда давом эттириши мумкин. Ярим ҳимоячига Ла Лиганинг тўрт клуби қизиқиш билдирмоқда.

Talksport нашрининг хабар беришича, Аллини “Овьедо”, “Севилья”, “Эльче” ва “Хетафе” каби ўртамиёна жамоалар ўз сафига қўшиб олишга тайёр.

29 ёшли футболчи сентябрь ойи бошида Италиянинг “Комо” клуби билан шартномаси бекор қилинганидан кейин ишсиз қолганди. Деле Италияда атиги саккиз ой ўтказган ва ўтган мавсумда Сеск Фабрегас раҳбарлигида бор-йўғи бир ўйинда қатнашган.

Унинг 748 кундан кейинги илк расмий ўйини бор-йўғи тўққиз дақиқа давом этди: ўтган йил март ойида у тўғридан-тўғри қизил карточка олган. 2023 йилнинг февралидан бери майдонга тушмаган Деле “Комо”нинг “Милан”га қарши 1:2 ҳисобида мағлуб бўлган ўйинида захирадан майдонга тушган ва қўшимча вақтда Англия терма жамоасидаги шериги Рубен Лофтус-Чикка нисбатан қоидабузарлик қилиб, майдондан четлатилганди.

Натижада, “Комо” бош мураббийи Фабрегас Аллини захира ўриндиғида қолдирди ва унинг 18 ойлик шартномаси охирига етмай, ўтган ёзда бекор қилинди. Энди ярим ҳимоячи фаолиятини Испанияда давом эттириш вариантларини кўриб чиқмоқда.