Ўзбек боксчиси бир неча камарлар соҳибини таслим қилди

Қозоғистоннинг Алмати шаҳрида ташкил этилган профессионал бокс кечасида бир неча мамлакатдан келган чарм қўлқоп усталари рейтинг жангларини ўтказди.

Тажрибали боксчимиз Хуршид Тожибоев фаолиятидаги олтинчи жангида россиялик Павел Меликов билан тўқнаш келди.

Хуршид профессионал боксчилик фаолиятини анча кеч – 2019 йилда бошлаган. Асосан тажрибали рақибларга қарши жанг қилаётган ҳамюртимиз шунга яраша рейтингда тез кўтариляпти. Айни пайтда Тожибоев зўз вазн тоифасида юртимизда биринчи рақамда қайд этилган, жаҳон рейтингида эса 125-поғонага кўтарилди ва кучли юзликка кириш арафасида турибди.

Жиззахлик чарм қўлқоп устаси ҳаваскорлар боксчида юқори натижаларни қайд этган. Бир неча бор қитъа ва жаҳон чемпионатлари, Олимпий ўйинлари иштирокчиси.

Тожибоев 2015 йилда Халқаро ҳаваскорлар боксуюшмаси томонидан ташкил этилган янги турнир - AIBA Pro Boxing таснифида чемпионлик жангини ўтказиб, қозоғистонлик Берик Абдураҳмоновни мағлуб этиб, 60 килограмм вазн тоифасида чемпионлик камарини қўлга киритган биринчи ўзбек боксчиси ҳисобланади.

Унинг профессионал фаолиятидаги олтинчи рақиби анча тажрибали – катта рингда 21 та жангда 16 та ғалаба, битта дуранг ва тўртта мағлубият қайд этган Павел Меликов минтақавий даражада бир неча камарларга эгалик қилган. Хусусан, россиялик боксчи етти йил давомида мағлубиятсиз серия кўрсатган, Россия чемпиони, World Boxing Council Asian Boxing Council Silver Light Title, World Boxing Association Asia Light Title, Eurasian Boxing Parliament Light Title титулларини қўлга киритган.

Икки тажрибали чарм қўлқоп устасининг ўзаро тўқнашувида Хуршид Тожибоевнинг зарбаларига дош беролмаган Меликов тўртинчи раундда таслим бўлди. Шу тариқа, боксчимиз юз фоизлик натижа билан ғалабали сериясини олтитага етказди.

Алматидаги бокс кечасида рингга чиққан яна уч нафар боксчимиз енгилмас рақиблар билан куч синашиб мағлубиятини тан олишга мажбур бўлди.

10 та ғалаба ва 16 та мағлубият қайд этган Бахит Абдураҳимов мезбонлар вакили Айдос Мемет билан саккиз раунд жанг қилиб, очколар ҳисобида имкониятни бой берди. Қозоғистонлик боксчси кетма-кет тўққизинчи ғалабасини нишонлади.

Муҳаммадсалим Сотволдиевнинг натижаларида барқарорлик етишмаяпти. Бу боксчимиз асосан кучли рақибларга қарши жанг қиляпти. Фаолияти давомида россиялик Вячеслав Летовальцев, арманистонлик Радик Григорян каби мағлубиятсиз одимлаётган боксчиларнинг ғалабали одимини тўхтатган ҳамюртимиз Алматидаги бокс кечасида қозоғистонлик Рахат Саитжон билан куч синашди.

Кескин ва муросасиз ўтган баҳсда ҳакамлар очколар ҳисобидаги ғалаба мезбон боксчига насиб қилганини эълон қилди. Рахат кетма-кет саккизинчи ғалабасини нишонлади.

Муҳаммадсалим Сотволдиевнинг рекорди етти ғалаба, тўрт мағлубият ва бир дуранг кўринишига келди.

Профессионал фаолиятини муваффақиятли бошлаган Мансур Абдумаматов энди мағлубиятлар тўридан чиқиб кета олмаяпти. Дастлабки олтита жангида кучли рақибларни енгган Мансур Алматидаги турнирда кетма-кет бешинчи мағлубиятини қабул қилиб олди. Ҳамюртимиз ўзи мағлуб бўлган барча жангларда муддатидан олдин таслим бўлганини ҳам маълумот ўрнида келтириш лозим.

Мезбонлар вакили Рай Саиджонов саккиз раундлик жангнинг тўртинчи раундида Мансурни соф нокаутга учратиб, ғалабали одимини тўққизта учрашувга етказиб олди.