Ўзбек боксчисининг жанжалли жангига Украинадан муносабат бўлди

Польшанинг Вроцлав шаҳри мезбонлик қилган профессионал бокс кечасида ўзбекистонлик Лазизбек Муллажонов ва қозоғистонлик Нурсултон Аманжолов ўртасидаги жангда юзага келган вазиятга Украинанинг Dialog.ua сайти ҳам муносабат билдирди.

Украиналикларнинг бу жангга эътибор қаратиши бежиз эмас. Чунки бу тўқнашув украиналик Александр Усик ва британиялик Даниэль Дюбуа ўртасидаги тўртта йўналиш чемпионлик камарлари учун ташкил этилган мусобақа доирасида бўлди.

Кечанинг асосий жангида Усик рақибини енгиб, камарларни ўзида қолишини таъминлади.

Бу жангга қадар, ўта оғир вазн тоифасидаги осиёлик икки енгилмас боксчининг ўзаро тўқнашуви ташкил этилди. Бу баҳс атиги бир раунд давом этди холос.

Қозоғистонлик рақиб ўзбек боксчисининг шиддатли ҳужумларига қарши тура олмади. Учрашув рефериси жангни тўхтатганидан кейин Нурсултон Аманжолов унга эътироз қилиб, ҳакамни турта бошлади ва бир муддат мағлубиятини тан олишни истамади.

Айнан мана шу ҳолат кўпчиликнинг эътиборини тортди ва мухлису мутахассислар ўртасида муҳокамаларга сабаб бўлмоқда.  Dialog.ua сайти ҳам бунга ўз қарашларини билдирди.

- Украиналик ва британиялик боксчилар ўртасидаги жанг андеркардида Қозоғистон вакили Нурсултон Аманжолов ва Ўзбекистон боксчиси Лазизбек Муллажаонов ўзаро тўцнаш келган баҳсда можароли вазият келиб чиқди.

Биринчи раунд охирларида ўзбек боксчиси рақибини канатга қисиб қўйиб, унга зарбалар сериясини йўллади. Ўша паллада қозоқ ўзини буткул йўқотиб қўйди: қўлини пастга туширди ва жағига ён томонлама кучли зарбани ўтказиб юборди.

Рингдаги ҳакам Аманжоловнинг бу тариқа дўппосланишини ортиқ томоша қилиб тура олмади ва жангни тўхтатди. Қозоғистонлик чарм қўлқоп устаси бу қарорга умуман қўшилмади. У ўз бурчагига боришдан бош тортди, аламини ҳакамдан олишга уриниб, уни бир неча маротаба турткилади ҳам.

Анчагача давом этган тортишувлардан кейин қозоқ боксчиси ўз бурчагига йўл олди. Йўл-йўлакай бақириб ҳам олди. Жангда Аманжоловга биринчи раундда техник нокаут билан мағлубият ёзилди. Бу қозоғистон боксчининг профессионал фаолиятидаги биринчи мағлубияти бўлди, - деб ёзди Dialog.ua сайти.

Таъкидлаш керакки, жангдан кейин ўзини босиб олган Нурсултон Аманжолов инстаграм саҳифасида пост қолдириб, барибир мағлубиятини тан олди.

- Жангда мен ютқаздим. Шундай бўлиши тақдир қилинган экан. Рақибимга муваффақият тилайман, - деб ёзди Аманжолов ижтимоий тармоқдаги саҳифасига.

Шу тариқа, ҳам ҳаваскорлар ўртасида, ҳам профессионал рингдаги фаолиятини давом эттираётган Лазизбек Муллажонов ўз ҳисобига яна бир катта ғалабани ёздириб қўйди.

Эслатиб ўтамиз, Муллажонов ҳаваскорлар боксида Осиё чемпионати ғолиби, жаҳон чемпионати совриндори ва ҳарбийлар ўртасидаги жаҳон чемпиони ҳисобланади.

Ўзбекнинг зарбаси кучли экан, ногирон қилиб қўярди!

Ўзбек боксчисидан нокаут бўлган рақиб жанжал кўтарди, баҳона топди ва барибир мағлубиятини тан олди!