O‘zbek futbolchilari Evropa Chempionlar ligasida porlashi kutilyapti...

Evropadagi yangi mavsumda UEFA a’zosi – Qozog‘istonning uchta klubi –  “Ordabasi” (Chempionlar ligasi), “Tobol” (Evropa Ligasi) va “Aktobe” (Konferentsiyalar ligasi) xalqaro miqyosdagi musobaqalarda ishtirok etadi.

O‘tgan yili o‘zbek futbolchilari – Bobur Abduxoliqov va Shahboz Umarov yordamida o‘z tarixida ilk bor Qozog‘iston chempionligini qo‘lga kiritgan chimkentliklar Evropa qit’asining eng nufuzli musobaqasi – Chempionlar ligasidagi ilk raqibini bilib oldi.

“Ordabasi” musobaqani birinchi saralash bosqichidan boshlaydi. Bu raundda dastlabki o‘yinlar 9-10 iyul kunlari tashkil etiladi. Javob uchrashuvlari 16-17 iyulga belgilangan.

Qozog‘istonning amaldagi chempioni ilk bosqichda Moldovaning “Petrokub” jamoasi bilan raqobatlashadi. Birinchi uchrashuv Chimkent shahridagi arenada bo‘lib o‘tadi.

Chempionlik mavsumidan keyin Shahboz Umarov “Ordabasi”da qolishga qaror qilgan edi. Yurtimizga qaytgan Bobur Abduxoliqov o‘rnini katta tajribaga ega legioner Jasurbek Yaxshiboev egalladi.

Qo‘shni mamlakat premer-ligasida sakkizta bahsda o‘z hisobiga to‘rtta gol yozdirib qo‘ygan 26 yoshli hujumchimiz jamoasining eng yaxshi to‘purari hisoblanadi.

Qolaversa, Yaxshiboev Evropa Chempionlar ligasida o‘ynash tajribasiga ega. Jasur 2021 yili sentyabrda Moldova chempioni “Sherif” safida “Santyago Bernabeu”da “Real” darvozasiga super gol urib, jamoasining tarixiy g‘alabasini ta’minlagan edi.

O‘sha musobaqaning guruh bahslarida Italiyaning “Inter” va Ukrainaning “Shaxtyor” jamoalariga qarshi maydonga tushgan.

Bundan tashqari, Jasurbek Moldova maydonlarida bo‘lajak raqib – “Petrokub”ga qarshi ikkita bahsda ishtirok etib, bittadan gol va assist qayd etgan.

Shuningdek, Jasur Evropa Ligasida Portugaliyaning kuchli klublaridan biri “Braga” bilan bo‘lgan bahsda boshlang‘ich tarkibda ikkita o‘yin o‘tkazgani ham uning foydasiga ishlaydi.

“Ordabasi”dagi ikkinchi vakilimiz Shahboz Umarov ham UEFA turnirida o‘ynash tajribasiga ega. Chimkentliklar safida Konferentsiyalar ligasining ikkinchi davrasida Polsha Chempioni “Legiya”ga qarshi ikkala bellashuvda ham maydonda harakat qilgan.

Demak, Chempionlar ligasining yangi mavsumida Jasurbek Yaxshiboev va Shahboz Umarov xalqaro miqyosda o‘zini ko‘rsatishiga umid qilamiz.

Husanovning jamoadoshi Mbappening burnini sindirganidan keyin nimalar dedi?

Tezkor: Taniqli legionerimiz jamoasini tark etdi!

Legionerimiz turklarni qanday hayratga soldi?

O‘zbekistondan yana bir jahon chempioni – superbokschi etishib chiqmoqda!

Shomurodovni olish oson bo‘lmayapti...