Ўзбек полвони шоҳсупага кўтарилди

25 апрель куни Бангкок шаҳрида дзюдо бўйича катталар ўртасида ўтаётган Осиё чемпионатининг илк кунида маҳоратли дзюдочимиз Замаҳшари Бекмуродов -66 килограмм оғирликда кумуш медалга сазовор бўлди.

Чемпионатнинг саралаш беллашувларида барча рақибларини мағлубиятга учратган Бекмуродов финалда ўтган йилги жаҳон ва қитъа чемпиони, олтита “Катта дубулға” турнирлари совриндори, япониялик Рёма Танака билан рўбарў келди.

Шиддатли кечган беллашув қўшимча дақиқаларга қадар етиб борди. Таиланд татамисининг энг жозибали беллашуви кўринишини олган мазкур курашда тажриба ўз сўзини айтди. Япониялик дзюдочи олтин, ҳамюртимиз кумуш медални қўлга киритди.

Айтиш лозим, Бекмуродов ўтган йили Жанубий Кореяда ёшлар ўртасида ўтган қитъа чемпионатида ушбу вазнда олтин медалга эгалик қилган.

23 та давлатнинг 220 нафар дзюдочиси иштирок этаётган қитъа чемпионатида 15 та медаллар жамланмаси учун курашлар кечмоқда.