Ўзбек полвонлари Бухорода кураш тушди (фото)
Ads

Бухоро шаҳридаги олимпия захиралари коллежида кураш бўйича эркаклар ва хотин-қизлар ўртасида Ўзбекистон чемпионати бўлиб ўтди.

Унда Қорақалпоғистон Республикаси, вилоятлар ва Тошкент шаҳридан келган полвонлар ғолиблик учун гиламга тушди.

Уч кун давом этган мусобақада ўз вазн тоифасида эркаклар ўртасида Тошкент вилоятидан Фарид Амруллаев, бухоролик Маъруф Ғайбуллаев, Қашқадарё вилоятидан Давлат Абраев, Илҳом Жўраев, самарқандлик Сарвар Шомуродов, Сурхондарёдан Шермуҳаммад Жандириев, пойтахтлик Бекмурод Олтибоев олтин медалга сазовор бўлди.

Хотин-қизлар ўртасида Самарқанд вилоятидан Нодира Гулова, Сурхондарё вилояти вакилалари Гулнора Сулаймонова, Рината Илматова, Қорақалпоғистон Республикасидан Амангул Алланазарова, хоразмлик Турсунпошшо Нурметова, Раҳима Йўлдошева, Жиззахдан Адиба Ўрозбоева, пойтахтлик Гулноза Матниёзова ҳам мамлакат чемпиони бўлди.

– Аввало, мезбонлар мусобақага пухта тайёргарлик кўрганини эътироф этиш лозим, – дейди кураш бўйича Ўзбекистон терма жамоаси бош мураббийи Ризамат Солиев. – Яна бир муҳим жиҳати, чемпионат кучли рақобат муҳитида ўтди. Мусобақа янги номларни кашф этганлиги билан эсда қолди.

Миллий қадриятимиз ҳисобланган курашимизнинг халқаро нуфузи тобора ошиб бормоқда. У биринчи бор Индонезияда ўтадиган ёзги Осиё ўйинлари дастурига расман киритилгани ҳам бежиз эмас. Мусобақада эркаклар 66, 81, 90 ва 90 килограммдан зиёд, аёллар 52, 73 ва 78 килограмм вазнлар тоифаси баҳслашди.

Ўзбекистон чемпионати ғолиблари ва бошқа совринли ўринлар соҳиблари медаллар ҳамда қимматбаҳо совғалар билан тақдирланди.

Манба:uza.uz

Фотоларни Тоҳир Истатов тавсия этган.