Ўзбекистон футбол ҳакамлари марказига раҳбар тайинланди

Хабарингиз бор, юртимизда ўтказиладиган барча турдаги футбол мусобақаларини бошқарувчи ҳакамлар фаолиятини мувофиқлаштирилиш, ҳакамларни тайёрлаш, қайта тайёрлаш ва малакасини ошириш, шунингдек, уларни ташкилий-бошқарув фаолиятига кўмаклашиш мақсадида Ўзбекистон футбол ҳакамлари маркази ташкил этилди.

Ўзбекистон футбол ассоциацияси президенти томонидан ушбу марказга Эркин Бахтиёров директор этиб тайинланди. Бундан аввал Э.Бахтиёров ЎФА тизимида турли лавозимларда, жумладан Ҳакамлар бўлими бошлиғи сифатида фаолият олиб борган. Мазкур марказ Ўзбекистон ҳудудида футбол, аёллар футболи, мини футбол, соҳил футболи, турли ёш тоифасидаги болалар ва ўсмирлар футболи турнирларида ҳакамлик билан боғлиқ жараёнларни мувофиқлаштиради.