Ўзбекистон футзал терма жамоаси энг яхши номи учун номзод!

Футзал оламида нуфузли ҳисобланган Futsalplanet.com сайти томонидан мунтазам равишда йилнинг энг яхшилари аниқлаб келинади. Бу галги “Futsalplanet Awards” маросими олдидан турли номинацияларда 2021 йилнинг кучли ўнликлари эълон қилинди. Қувонарлиси, унда Ўзбекистон футзалчилари ҳам бор.

Хусусан, дунёнинг энг яхши футзал жамоаси номи учун кучли ўнликда Ўзбекистон миллий терма жамоаси қайд этилган. Футзалчиларимиз билан бирга ушбу рўйхатдан Аргентина, Босния-Герцеговина, Эрон, Япония, Қозоғистон, Марокаш, Португалия, Словакия ва Венесуэла терма жамоалари жой олишган.

Йилнинг энг яхши терма жамоалар мураббийи номинациясида эса, Ўзбекистон терма жамоаси бош мураббийи Баҳодир Аҳмедов кучли ўнталикдан жой олди. Жаҳон чемпионатида ёрқин ва иродали ўйин кўрсатган футзалчиларимиз ва мураббийлар штабига бу яна бир муносиб эътироф бўлганини таъкидлаб ўтиш керак.