O‘zbekiston milliy terma jamoasi 20 ta o‘yindan beri mag‘lub bo‘lgani yo‘q

Kecha O‘zbekiston milliy terma jamoasi "Jahon chempionati-2026" saralashi doirasida BAAga qarshi o‘ta muhim o‘yinda maydonga tushdi va Otabek Shukurov tomonidan penaltidan kiritilgan yagona gol evaziga qimmatli 3 ochkoni qo‘lga kiritdi. 

Bu orqali vakillarimiz o‘z ochkolari hisobini 10 taga etkazib oldi va turnir jadvalida Eron bilan birgalikda yakka peshqadam bo‘lib turibdi. Endi hamyurtlarimiz navbatdagi uchrashuvini 14 noyabr kuni azaliy va ashaddiy raqibimiz sanalgan Qatar milliy terma jamoasi bilan safarda o‘tkazadi. Oradan 5 kun o‘tib, 19 noyabr sanasida esa, termamiz Laos mamlakatiga tashrif buyuradi va u erda ham mundial saralashi yo‘lidagi navbatdagi qarama-qarshilikda maydonga chiqadi. Raqib esa, yana bir yaxshigina boshog‘riq sanalgan Shimoliy Koreya milliy terma jamoasi bo‘ladi.

E’tiborga molik jihati, kechagi g‘alabadan so‘ng, termamiz o‘ziga tegishli rekordni yanada yaxshilab oldi. Gap shundaki, O‘zbekiston 20 ta o‘yindan beri mag‘lubiyat nimaligini bilmay kelmoqda. Jamoamiz so‘ngi marotaba 2023 yilning 10 sentyabr kuni AQShga yirik 3:0 ko‘rinishida mag‘lub bo‘lgan edi. Bu borada hattoki, "Evro-2024" g‘olibi Ispaniya va Afrika millatlar kubogining amaldagi sohibi Senegal ham bizga teng kela olmaydi. "Qizil furiya"da bu borada 14 o‘yinlik mag‘lubiyatsiz seriya mavjud. Sadio Mane etakchiligidagi "Terangi sherlari" esa, 16 o‘yindan beri yutqazmay kelmoqda.

AQSh bilan o‘yindan keyin bo‘lib o‘tgan 20 ta bellashuvning 13 tasida biz muzaffariyatga erishganmiz. Qolgan 7 ta bahs durang natija bilan xotima topgan. Qatar bilan Osiyo Kubogining chorak finalida o‘tkazilgan o‘yinda garchi mag‘lub bo‘lgan bo‘lsakda, u qarama-qarshilikning yakuniy natijasi penaltilar seriyasiga ko‘ra hal bo‘lganligi sababli mazkur bellashuv halqaro reestrimizga mag‘lubiyat sifatida kiritilmaydi. 

Shu o‘rinda ba’zi manbalarda bizning yutuqli seriyamiz 20 ta emas, balki 18 ta deb ko‘rsatilmoqda. Sababi shundaki, o‘tgan yilning 25 dekabrida Qirg‘iz Respublikasi va shu yilning 7 yanvar kuni Falastinga qarshi o‘tkazilgan halqaro o‘rtoqlik uchrashuvlari FIFA kunlaridan tashqarida bo‘lib o‘tgan. Shu boisdan ham, xalqaro futbol federatsiyasining rasmiy sahifalariga bu ikki bahsning natijalari kiritilmagan. Biroq, rasmiy bo‘lmasa-da, terma jamoamiz ayni paytda 20 ta o‘yindan beri mag‘lub bo‘lmay kelayotganligi bu aniq fakt. 

Nima bo‘lgan taqdirda ham biz ohirigacha milliy terma jamoamizga ishonamiz. Oldimizda turgan navbatdagi ikki bahsda ijobiy natijaga erishib, 2025 yilning 20 mart kuni Qirg‘iz Respublikasiga qarshi bo‘ladigan qarama-qarshilikda barchamiz vatan jamoasini tarixda ilk bor har to‘rt yillikning eng nufuzli musobaqalaridan biri Jahon chempionatiga yo‘l olganini nishonlash nasib etsin.

                                                                                                                                                                                                         Humoyunmirzo Ergashev